انڈین ریاست گجرات میں مسجد پر تنازع،کوڑے مارنے کی ویڈیو وائرل

Reading Time: < 1 minute

انڈیا کی ریاست گجرات کے ضلع جونا گڑھ میں مسجد کو مسمار کرنے کے تنازع پر ہونے والے پُرتشدد احتجاج کے دوران ایک بزرگ شہری ہلاک اور چار پولیس اہلکار زخمی ہوگئے ہیں۔

سوشل میڈیا پر اس واقعے سے متعلق ایک ویڈیو بھی وائرل ہوئی ہے جس میں مسجد کے باہر کچھ افراد کو تشدد کا نشانہ بنتے اور کوڑے کھاتے ہوئے دیکھا جاسکتا ہے۔

انڈین میڈیا کے مطابق جمعے کو جونا گڑھ میں قائم مسجد کو مسمار کرنے کے لیے نوٹسز جاری ہونے کے بعد یہ احتجاج شروع ہوا اور جمعے کی رات لوگوں کے ایک جتھے نے پولیس پر حملہ کر دیا۔

پولیس نے اس واقعے کے ملوث ہونے کے شبہہ میں 174 افراد کو گرفتار کیا ہے۔

جونا گڑھ کے سپرینٹینڈنٹ آف پولیس تیجا وسمسٹی کے مطابق ہلاک ہونے والے بزرگ شہری کی موت پتھراؤ کی زد میں آنے کی وجہ سے ہوئی۔

جونا گڑھ رینج کے انسپیکٹر جنرل آف پولیس ایم اے چھواڈا نے احتحاج کے حوالے سے صحافیوں کو بتایا کہ 62 سالہ شہری مظاہرین کا حصہ نہیں تھے بلکہ ایک راہگیر تھے جو پتھراؤ کی زد میں آ کر جان کی بازی ہار گئے۔