ویڈیوز حریم شاہ کی رضامندی سے بنیں، صندل خٹک ضمانت پر رہا

Reading Time: < 1 minute

سپیشل جج سینٹرل اسلام آباد نے ٹک ٹاکر حریم شاہ کی لیک ویڈیوز کے مقدمے میں ملزمہ ٹک ٹاکر صندل خٹک کی درخواستِ ضمانت بعد از گرفتاری کو منظور کر لیا ہے۔

منگل کو سپیشل جج سینٹرل اعظم خان کی عدالت میں ملزمہ صندل خٹک کے وکیل مصدق برقی پیش ہوئے۔

وکیل کے مطابق صندل خٹک کو کوئی نوٹس نہیں ملا تھا لیکن مقدمہ براہ راست درج کرلیاگیا، حریم شاہ کی صندل خٹک کے خلاف ایف آئی اے لاہور اور پشاور میں درخواست خارج ہوئی۔

وکیل نے بتایا کہ صندل خٹک نے لائیو اسٹریمنگ شئیر کی، خود ریکارڈنگ نہیں کی،صندل خٹک کے موبائل سے کوئی ثبوت نہیں ملا۔

وکیل کا کہنا تھا کہ ٹک ٹاک کے قوانین کے مطابق نازیبا وڈیوز اپلوڈ نہیں کی جاسکتیں، حریم شاہ کی جب ویڈیوز بنائی گئیں تو تب وہ ہنس رہی تھیں۔

ملزمہ کے وکیل نے کہا کہ جس نے بھی بنائیں، حریم شاہ کی ویڈیوز ان کی رضامندی سے بنائی گئیں۔

وکیل کے مطابق صندل خٹک سے دوران تفتیش کچھ برآمد نہیں ہوا، تفتیش میں درکار بھی نہیں، صندل خٹک نے موبائل دےدیالیکن حریم شاہ کا موبائل نہیں لیاگیا۔

عدالت نے دلائل سننے کے بعد ملزمہ صندل خٹک کی درخواستِ ضمانت منظور کرتے ہوئے رہا کرنے کا حکم دیا۔