نواز شریف کے بارے میں بیان، نگراں وزیر داخلہ کا یوٹرن؟
Reading Time: 2 minutesمسلم لیگ ن کی جانب سے سخت ردعمل کے بعد نگراں وزیر داخلہ سرفراز احمد بگٹی کی نواز شریف کی گرفتاری پر بیان کے حوالے سے وضاحت کی ہے۔
وزیر داخلہ نے کہا ہے کہ بیان کو سیاق سباق سے ہٹ کر سیاسی رنگ دیا گیا، نگران حکومت کا کوئی سیاسی ایجنڈا نہیں۔
اُن کا کہنا تھا کہ یہ بات خوش آئند ہے کہ نواز شریف پاکستان کی سیاست میں واپس آنا چاہتے ہیں۔
وزیر داخلہ کے مطابق پاکستان کے عوام کا ایک بڑا حصہ انہیں خوش آمدید کرنے کی تیاریوں میں مشغول ہے۔
وزیر داخلہ نے کہا کہ وطن واپسی پر نواز شریف سے قانون کے مطابق سلوک کیا جائے گا، چہ مگوئیوں اور مفروضوں سے باہر نکل کر معاملات کو حقیقت کے آئینہ سے دیکھنا ہوگا۔
وزیر داخلہ کے مطابق نگران حکومت اپنے مینڈیٹ کے مطابق کام کرے گی۔
اس سے قبل ن لیگ کے رہنماؤں رانا ثنا اللہ اور مریم اورنگزیب نے سرفراز بگٹی کے بیان پر سخت ردعمل ظاہر کیا تھا۔
مسلم لیگ (ن) پنجاب کے صدر اور سابق وفاقی وزیر داخلہ رانا ثناء اللہ نے نگران وزیر داخلہ سرفراز بگٹی کے بیان کو "حد سے تجاوز” قرار دیا تھا۔
ان کا کہنا تھا کہ سرفراز بگٹی صاحب بیان دینے سے پہلے وزیرِ داخلہ شیخ رشید کا انجام دیکھ لیں ۔
رانا ثنااللہ کے مطابق نواز شریف کے خلاف سازش کا خمیازہ عوام اور ملک نے بھگتا ہے۔ نواز شریف کے خلاف جھوٹے کیس بنا کر ملک کے ساتھ اور عوام کے ساتھ دشمنی کی گئی ۔
سرفراز بگٹی نواز شریف کے بارے میں بیان بازی سے اپنا قد بڑھانے کی کوشش نہ کریں۔ نواز شریف جیلوں اور فورس کا سامنا کرچکے ہیں۔
انہوں نے کہا تھا کہ نواز شریف کی فکر چھوڑیں اپنے کام پہ توجہ دیں
نواز شریف نے ائیرپورٹ سے 21 اکتوبر کو کہاں جانا ہے یہ وزیرِ داخلہ وفاق کا فیصلہ نہیں ہوگا یہ عوام کا فیصلہ ہو گا۔
ن لیگ کے مطابق نواز شریف ہمیشہ کی طرح عدالتوں میں قانون کے مطابق تقاضے پورے کریں گے۔