دنیا کی 10 طاقتور کرنسیاں، ڈالر پہلے نمبر پر کیوں نہیں؟
Reading Time: 2 minutesامریکی ڈالر دنیا بھر میں سب سے زیادہ استعمال ہونے والی اور نمایاں ترین کرنسی ہے لیکن یہ دنیا میں سب سے طاقتور کرنسی نہیں.
یہ جان کر یقینا حیرت ہوئی ہوگی.
معروف امریکی جریدے ’فوربز‘ نے اپنی حالیہ رینکنگ میں امریکی ڈالر کو طاقتور ترین کرنسیوں کی فہرست میں 10واں نمبر دیا ہے۔
فوربز میگزین کی رپورٹ کے مطابق اقوام متحدہ میں 180 کرنسیوں کو قانونی حیثیت حاصل ہے تاہم کسی بھی کرنسی کی مقبولیت یا اس کا زیادہ استعمال اس کے مستحکم ہونے کی علامت نہیں۔
گزشتہ ہفتے جاری کی گئی فوربز کی رینکنگ میں کویتی دینار طاقتور ہونے کے اعتبار سے پہلے نمبر پر ہے جس کی مالیت تین اعشاریہ 25 ڈالر کے برابر ہے۔
دوسرا نمبر بحرینی دینار کا ہے جس کی مالیت دو اعشاریہ 65 ڈالر ہے۔
عمانی ریال دو اعشاریہ 60 ڈالر کے ساتھ تیسرے، اردنی دینار ایک اعشاریہ 41 ڈالر کے ساتھ چوتھے، جبرالٹر اور برطانوی پاؤنٖڈ ایک اعشاریہ 27 ڈالر کے ساتھ پانچویں اور چھٹے نمبر پر ہے۔
ساتواں نمبر کیمین آئی لینڈ ڈالر کا ہے جس کی مالیت ایک اعشاریہ 20 ڈالر ہے۔
سوئٹزرلینڈ کا فرینک ایک اعشاریہ 17 ڈالر مالیت کے ساتھ آٹھویں جبکہ یورو ایک اعشاریہ نو ڈالر قیمت کے ساتھ نویں نمبر پر ہے۔
اس کے بعد امریکی ڈالر کا 10واں نمبر آتا ہے۔
امریکی ڈالر دنیا میں بہت زیادہ استعمال ہونے والی اور اکثر بنیادی ریزرو کرنسی شمار ہوتی ہے لیکن کئی وجوہات کی بنا پر طاقتور ہونے کے اعتبار سے یہ متعدد کرنسیوں سے نیچے ہے۔
کسی بھی کرنسی کے مضبوط یا طاقتور ہونے کا دارومدار اس کی قوتِ خرید اور دیگر کرنسیوں کے ساتھ مالیتی تقابل پر بھی ہوتا ہے۔
کسی بھی کرنسی کے طاقتور ہونے کا اندازہ فارن ایکسچینج مارکیٹ کے رجحانات، مہنگائی کی شرح، مقامی معاشی نمو، مرکزی بینک کی پالیسیوں اور ملک کی مجموعی پیداوار جیسے عناصر کا تجزیہ کر کے لگایا جاتا ہے۔
کویتی دینار 1960 میں اپنے اجراء کے بعد سے آج تک دنیا کی مضبوط ترین کرنسی شمار ہوتا ہے۔
کویتی دینار کے مستحکم ہونے کی سب سے بڑی وجہ تیل کے ذخائر کی وجہ سے وہاں کا معاشی استحکام اور ٹیکس سے آزاد نظام ہے۔
فورنز میگزین کے مطابق سوِس فرانک اپنے مستحکم ہونے کے اعتبار سے دنیا میں پہلے نمبر کی کرنسی شمار کی جاتی ہے۔
طاقتور کرنسیوں کی یہ درجہ بندی 10 جنوری تک کے معاشی محرکات اور کرنسیوں کی اتار چڑھاؤ کو سامنے رکھتے ہوئے کی گئی ہے۔
