نو مئی مقدمات پر مزید مہلت، ایسے نہیں چلے گا: چیف جسٹس

Reading Time: < 1 minute

سپریم کورٹ میں 9 مئی واقعات میں ملوث ملزمان کی ضمانت منسوخی کی اپیلوں پر سماعت کے دوران عدالت کو بتایا گیا کہ پنجاب حکومت نے سینیئر وکیل ذوالفقار نقوی کی خدمات حاصل کر لی ہیں۔

پیر کو ذوالفقار نقوی ایڈووکیٹ نے سپریم کورٹ کو بتایا کہ پنجاب حکومت نے مجھے 9 مئی مقدمات میں وکیل مقرر کیا ہے، عدالت سے استدعا ہے کہ تیاری کیلئے وقت دیا جائے۔

چیف جسٹس یحیی آفریدی نے کہا کہ نو مئی کے مقدمات تو کل اور پرسوں بھی مقرر ہیں،
گزشتہ سماعتوں پر ایڈیشنل پراسیکیوٹر پیش ہو کر مہلت مانگتے رہے، آج آپ وقت مانگ رہے ہیں، ایسے نہیں چلے گا۔

چیف جسٹس یحییٰ آفریدی نے کہا کہ یہ کوئی ایک کیس نہیں 50 کے لگ بھگ اپیلیں ہیں۔

ذوالفقار نقوی ایڈووکیٹ نے استدعا کی کہ رواں ہفتے کے مقدمات ملتوی کر دیں آئندہ ہفتے والوں کی تیاری کرکے آئوں گا۔

چیف جسٹس یحیی آفریدی نے کہا کہ کچھ اپیلیں کیس منتقلی کے حوالے سے بھی ہیں، کیس منتقلی کا معاملہ ختم ہو چکا اس پر حکومت سے ہدایات لے لیں۔

ذوالفقار نقوی نے بتایا کہ جج کا تبادلہ ہوچکا صرف جرمانے اور کچھ آبزرویشنز کی حد تک اپیل کی پیروی کریں گے۔

عدالت نے نو مئی اور دس مئی کے رواں اور آئندہ ہفتے مقرر تمام مقدمات ڈی لسٹ کر دیے۔

عدالت نے پنجاب حکومت کی مہلت کی استدعا منظور کر کے تمام مقدمات کی سماعت عید کے بعد کرنے کا آرڈر لکھوایا۔

چیف جسٹس یحیی آفریدی کی سربراہی میں تین رکنی بینچ نے مقدمات کی سماعت کی۔

لاہور ہائی کورٹ نے نو مئی کے ملزمان کی ضمانتیں منظور کی تھیں۔

پنجاب حکومت نے ضمانتیں منسوخ کرنے کے لیے سپریم کورٹ سے رجوع کر رکھا ہے۔