جہاں فائدہ وہاں کی شہریت، چیف جسٹس

سپریم کورٹ لاہور رجسٹری میں دہری شہریت از خود کیس کی سماعت کے بعد عدالت نے تحریک انصاف کے نو منتخب سینیٹر چوہدری سرور کو برطانوی شہریت چھوڑنے کا بیان حلفی جمع کرانے کا حکم دیا ہے۔

چیف جسٹس ثاقب نثار کی سربراہی میں سینٹرز دہری شہریت کیس کی سماعت ہوئی ۔ تحریک انصاف کے رہنما چوہدری سرور عدالت میں پیش ہوئے اور بتایا کہ 2013 میں برطانوی شہریت چھوڑ چکا ہوں جس پر چیف جسٹس نے ریمارکس میں کہا کہ  دہری شہریت کا فیصلہ 2012 میں آیا تو پھر ان کی نااہلی تب سے شروع ہونی چاہیے، یہ ہیں پاکستان کے نمائندے جہاں فائدہ ہوا وہاں کی شہریت لے لی، یہاں کی موجیں دیکھی تو یہاں واپس آگئے، انتخاب سے دو دن پہلے وطن کی محبت یاد آ گئی۔

عدالت سے نو منتخب سینٹرز نزہت صادق اور سعدیہ عباسی کے وکیل نے استدعا کی کہ کامیابی کا نوٹی فیکیشن روکنے کا حکم واپس لیا جائے، عدالت میں شہریت چھوڑنے کی دستاویزات جمع کرانے کی مہلت دی جائے ۔

چیف جسٹس نے کہا کہ اس کیس کو اسلام آباد میں سنیں گے، آپ اپنا بیان حلفی عدالت میں جمع کرائیں اور جب نوٹیفکیشن جاری ہوگا تو حلف برداری ہوگی ۔ مقدمے کی سماعت 13 مارچ تک ملتوی کر دی گئی ۔