کورونا وائرس سے کتنی ہلاکتیں؟

Reading Time: < 1 minute

چین سے پھیلنے والے کورونا وائرس سے ہلاک ہونے والوں کی تعداد سات سو سے تجاوز کر گئی ہے جبکہ ہلاک ہونے والوں میں اب ایک غیر ملکی بھی شامل ہو گیا ہے۔ 

خبر رساں اداروں کے مطابق چین میں اختتام ہفتہ 86 افراد وائرس سے ہلاک ہوئے اور یوں مرنے والوں کی تعداد 722 ہو گئی۔

ادھر چین میں امریکی سفارتخانے کے مطابق سنیچر کو وبا سے ہلاک ہونے والا پہلا غیر ملکی ایک 60 سالہ امریکی شہری ہے جس میں کورونا وائرس کی تصدیق جمعرات کو ہوئی تھی۔

سفارتخانے نے مرنے والے شخص سے متعلق مزید تفصیلات نہیں دیں۔ 

امریکی شہری کے علاوہ ایک 60 سالہ جاپانی باشندے کی بھی ووہان کے ہسپتال میں موت ہوئی ہے تاہم جاپان کی وزارتِ خارجہ کے مطابق ہلاک ہونے والے شخص میں اب تک کورونا وائرس کی تصدیق نہیں ہوئی ہے۔

قبل ازیں چین کی وزارتِ خارجہ نے کہا تھا کہ کورونا وائرس سے متاثر ہونے والوں میں سے 19 غیر ملکی ہیں جن میں سے دو صحت یاب ہو چکے ہیں۔ تاہم وزارتِ خارجہ نے ان کی قومیت ظاہر کرنے سے انکار کیا ہے۔ 

چین سے باہر ہونے والی ہلاکتوں میں اب تک فلپائن میں ایک چینی اور ہانگ کانگ میں ایک 39 سالہ شخص شامل ہیں۔ 

کورونا وائرس کے بارے میں کہا جاتا ہے کہ یہ گذشتہ سال دسمبر میں چین کے شہر ووہان میں ایک مارکیٹ سے شروع ہوا جہاں کھانے کے لیے جانور فروخت ہوتے ہیں۔ 

اس وائرس کا انکشاف کرنے والے ڈاکٹر کی بھی اسی سے ہلاکت ہوئی ہے۔

کورونا وائرس نے اب تک چین کے 34 ہزار شہریوں کو متاثر کیا ہے۔