امریکہ کی طالبان جنگجوؤں پر بمباری

افغانستان میں امریکی فوج کے ترجمان نے کہا ہے کہ طالبان جنگجوؤں پر بمباری کی گئی ہے تاہم انہوں نے اس کو دفاعی کارروائی قرار دیا۔

گزشتہ ہفتے قطر کے دارالحکومت دوحہ میں امن معاہدے پر دستخط کے بعد یہ امریکی فوج کی طالبان کے خلاف پہلی کارروائی ہے۔

بدھ کو امریکی فوج کے ترجمان سونی لیگیٹ نے ٖٹویٹ کیا کہ افغانستان کے صوبہ ہلمند کے علاقے نہر سراج میں ان طالبان جنگجوؤں کے خلاف فضائی کارروائی کی گئی ہے جو افغان پولیس کی چیک پوسٹوں پر حملے کر رہے تھے۔ 

فوجی ترجمان کے مطابق یہ ایک دفاعی کارروائی تھی جس کا مقصد طالبان کے حملوں کو روکنا تھا۔

قبل ازیں افغان حکام نے کہا تھا کہ ہلمند میں طالبان جنگجوؤں کے حملوں میں 20 افغان فوجی اور پولیس اہلکار مارے گئے۔

واضح رہے کہ امریکی صدر ٹرمپ نے قطر میں موجود افغان طالبان رہنما ملا عبدالغنی برادر سے ٹیلی فونک رابطہ کیا تھا اور بات چیت کو مثبت قرار دیا تھا جبکہ طالبان ترجمان نے کہا تھا کہ امریکہ کے ساتھ مستقبل میں بھی رابطہ رکھیں گے۔