ٹام ہینکس، ریٹا ولسن بھی کورونا سے متاثر

Reading Time: < 1 minute

امریکی فلم انڈسٹری کے معروف اداکار و ہدایت کار ٹام ہینکس بھی عالمی وبا کورونا کا شکار ہو گئے ہیں جبکہ صدر ڈونلڈ ٹرمپ نے کورونا سے بچاؤ کے اقدامات کے طور پر یورپ اور امریکی کے درمیان سفر پر عارضی پابندی عائد کر دی ہے۔

امریکی صدر نے کہا ہے کہ ان کے ملک میں کورونا کا بیج یورپ سے آنے والوں نے بویا۔ سفری پابندیوں کا اطلاق جمعے کی شب سے 30 یوم کے لیے ہوگا تاہم پروازیں معمول کے مطابق ہوں گی۔

بین الاقوامی خبر رساں اداروں کے مطابق کورونا کی وبا امریکہ میں تیزی سے پھیل رہی ہے اور ہالی وڈ کے اداکار ٹام ہینکس کا ٹیسٹ بھی مثبت آیا ہے۔

ٹام ہینکس کی اہلیہ ریٹا ولسن میں بھی کورونا وائرس کی تشخیص ہوئی ہے۔

امریکہ میں کورونا سے 39 ہلاکتوں کے بعد ایمرجنسی نافذ کر دی گئی ہے۔

واضح رہے کہ عالمی ادارہ صحت ڈبلیو ایچ او نے کورونا کو عالمی وبا قرار دیا ہے اور اٹلی میں صورتحال حکام کے قابو سے باہر ہو رہی ہے جہاں 837 افراد وائرس سے مر چکے ہیں۔

وبا دنیا کے 124 ملکوں میں چار ہزار چھ سو افراد کی جان لے چکی ہے۔