کورونا سے دو تہائی دنیا متاثر، ہوائی سفر بند

Reading Time: < 1 minute

چین سے پھیلنے والی عالمی وبا کورونا وائرس نے دنیا کے دو تہائی ملکوں کے شہریوں کو متاثر کیا ہے اور امریکہ، سعودی عرب اور ترکی نے بین الاقوامی پروازوں کو معطل کیا ہے جبکہ دنیا بھر میں لاکھوں افراد ہنگامی خریداری کر رہے ہیں جس کی وجہ سے اشیا کی قلت پیدا ہو رہی ہے۔

سنیچر کو سعودی عرب اور ترک حکومتوں نے اعلان کیا ہے کہ وہ بین الاقوامی پروازوں کو معطل کر رہی ہیں۔ ترکی نے یورپ کے کئی ملکوں کی ایئر لائنز اور مسافروں کو اپنے ملک آنے سے منع کر دیا ہے جبکہ سعودی عرب نے کہا ہے کہ وہ اتوار سے اپنے ایئرپورٹس پر بین الاقوامی پروازوں کے اترنے کو محدود کر رہا ہے۔

واضح رہے کہ دنیا میں کورونا وائرس سے اموات پانچ ہزار سے تجاوز کر چکی ہیں جبکہ 130 کے لگ بھگ ملکوں میں ڈیڑھ لاکھ افراد اس وبا کی زد میں آئے ہیں۔

دنیا میں طبی شعبے کو اس وقت غیر معمولی صورتحال درپیش ہے۔ امریکہ اور یورپ کے کئی ملکوں میں ایمرجنسی نافذ ہے۔

چین کے علاوہ اٹلی اور ایران میں سینکڑوں افراد وائرس سے ہلاک ہوئے ہیں۔ اٹلی میں حکومت نے پورے ملک کو ایک ماہ کے لیے لاک ڈاؤن کیا ہے۔ فرانس اور کینیڈا میں بھی کورونا کے متاثرین کی تعداد بڑھ رہی ہے۔

پاکستان میں اب تک 29 افراد میں وائرس کی تصدیق ہوئی ہے۔