اسلام آباد میں فائرنگ کرنے والا جج معطل

اسلام آباد ہائیکورٹ نے ریڈ زون میں جھگڑے کے دوران فائرنگ کرنے والے ایڈیشنل سیشن جج جہانگیر اعوان کو معطل کر دیاہے جبکہ دوسری جانب اسلام آباد کی مقامی عدالت نے جج جہانگیر اعوان کی اندراج مقدمہ کے حوالے سے درخواست پر پولیس سے جواب بھی طلب کرلیا ہے۔

اسلام آباد ہائیکورٹ کے رجسٹرار آفس کی طرف سے جاری نوٹیفکیشن کے مطابق ایڈیشنل ڈسٹرکٹ اینڈ سیشن جج جہانگیر اعوان تاحکم ثانی معطل رہیں گے۔

ایڈیشنل سیشن جہانگیر اعوان نے اتوار کی رات ایم پی اے عابدہ راجہ کے شوہر سے جھگڑے کے دوران فائرنگ کی تھی، جس پر چیف جسٹس اسلام آباد ہائیکورٹ نے محکمانہ رولز کے تحت ایڈیشنل سیشن جج کو معطل کیا۔

اس سے قبل معطل ایڈیشنل ڈسٹرکٹ اینڈسیشن جج جہانگیر اعوان نے تھانہ سیکرٹریٹ کی حدود میں پیش آنے والے واقعے پر اندراج مقدمہ کے لیے عدالت سے رجوع کیا تھا۔ 22 اے اور 22 بی کی درخواست میں موقف اپنایا گیا تھا کہ 13 ستمبر کو پیش آنے والے واقعہ سے متعلق تھانہ سیکرٹریٹ میں درخواست دی اور بیان بھی قلمبند کرایا مگر واقعے کی ایف آئی آر درج نہیں کی جارہی۔ واقعہ کامقدمہ درج کرنے اور ملزمان کو قرار واقعی سزا کیلئے احکامات جاری کیے جائیں۔

ایڈیشنل سیشن جج فیضان حیدر گیلانی نے جج جہانگیر اعوان کی درخواست پر سماعت کرتے ہوئے ایس ایچ او تھانہ سیکرٹریٹ کو بدھ تک رپورٹ پیش کرنے کا حکم دیا تھا۔