حکومت کی جسٹس قاضی فائز عیسیٰ کے خلاف ایک اور درخواست

پاکستان کی وفاقی حکومت نے جسٹس قاضی فائز عیسیٰ کے حق میں دیے گئے فیصلے پر ایک اور درخواست کی ہے جو سپریم کورٹ نے اعتراضات لگا کر واپس کر دی ہے۔
وزارت قانون نے کہا ہے کہ کیوریٹیو ریویو یا نظرثانی کی درخواست منگل کو دائر کی گئی تھی جس پر عدالت کے رجسٹرار دفتر نے اعتراضات عائد کیے ہیں۔
وزارت قانون کے مطابق اعتراضات کو ختم کر کے ازسرنو درخواست دائر کی جائے گی۔
خیال رہے کہ سپریم کورٹ کے دس رکنی بینچ نے اکثریتی فیصلے میں جسٹس قاضی فائز عیسیٰ کے خلاف صدارتی ریفرنس خارج کیا تھا اور سپریم جوڈیشل کونسل کو اس پر کارروائی سے روک دیا تھا۔