زرداری سے الہٰی کی ملاقات، ’آزاد عدلیہ اور جمہوریت لازم و ملزوم‘

Reading Time: 2 minutes

پاکستان پیپلز پارٹی کے شریک چیئرمین آصف علی زرداری سے مسلم لیگ ق کے رہنما اور پنجاب اسمبلی کے سپیکر چوہدری پرویز الہیٰ نے ملاقات کی ہے۔

منگل کو یہ اہم سیاسی ملاقات لاہور کے بلاول ہاؤس میں ہوئی۔

پیپلز پارٹی کے مطابق پنجاب اسمبلی کے سپیکر پرویز الہیٰ لاہور کے بلاول ہاؤس پہنچے جہاں سابق صدر آصف زرداری نے ان کا استقبال کیا۔

جاری کیے گئے بیان کے مطابق ’آصف زرداری اور پرویز الہی نے اس امر پر اتفاق کیا کہ وہ آزاد عدلیہ پر یقین رکھتے ہیں، آزاد عدلیہ اور جمہوریت لازم و ملزوم ہیں جبکہ عدلیہ کا احترام جمہوریت کا ایک جزو ہے۔‘

پیپلز پارٹی نے کہا ہے کہ ملاقات میں سابق صدر آصف زرداری اور پاکستان مسلم لیگ ق پنجاب کے صدر پرویز الہی کے درمیان سیاسی صورت حال پر تبادلہ خیال ہوا، دونوں رہنماؤں نے پنجاب کی سیاسی صورت حال پر بھی خصوصی گفتگو کی۔

اس ملاقات کو مبصرین پاکستان کی موجودہ سیاسی صورتحال میں اہم قرار دے رہے ہیں جہاں اس وقت پیپلز پارٹی اپوزیشن جماعتوں کے اتحاد ڈیموکریٹ موومنٹ (پی ڈی ایم) سے باہر ہے۔

لاہور میں ہونے والی اس ملاقات پر تحریک انصاف کی جانب سے تاحال صرف وزیراعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان نے ردعمل ظاہر کیا ہے۔

فردوس عاشق اعوان نے کہا کہ پرویزالٰہی اورآصف زرداری کی ملاقات حکومت کے لیے خطرے کی گھنٹی نہیں، مہمان نوازی اور میزبانی پنجاب کا کلچر ہے، آصف زرداری اور چوہدری برادران کے درمیان پرانے تعلقات ہیں۔

خیال رہے کہ گزشتہ ہفتے پنجاب اسمبلی میں مسلم لیگ ن کے قائد حزب اختلاف حمزہ شہباز نے بھی سپیکر پرویز الہیٰ سے ملاقات کی تھی۔
یاد رہے کہ پیپلز پارٹی کے رہنما ماضی قریب میں کئی بار مسلم لیگ ن کے رہنماؤں کو عثمان بزدار کی پنجاب حکومت کے اسمبلی میں عدم اعتماد کے ذریعے ختم کرانے کی پیشکش کر چکے ہیں۔

مسلم لیگ ق ماضی میں پیپلز پارٹی کی وفاقی حکومت میں اتحادی رہ چکی ہے جہاں چوہدری پرویز الہیٰ سینیئر وزیر تھے.