وفاقی وزیر منصوبہ بندی کی عوام سے چائے کے کم استعمال کی اپیل

Reading Time: < 1 minute

پاکستان کے وفاقی وزیر برائے ترقی و منصوبہ بندی احسن اقبال نے عوام سے اپیل کی ہے کہ چائے کے ایک یا دو کپ کم کریں کیونکہ ہم جو چائے درآمد کرتے ہیں وہ بھی ادھار لے کر کرتے ہیں۔

منگل کواحتساب عدالت کے باہر میڈیا سے گفتگو کرتے ہوئے وفاقی وزیر نے کہا کہ جب تک چائے کی پیداوار میں خود کفیل نہیں ہوتے یہ ہمارا فرض ہے کہ وہ تمام چیزیں بچائیں جن پر ہمیں اپنا قیمتی زر مبادلہ خرچ کرنا پڑتا ہے۔

وفاقی وزیر احسن اقبال نے کہا کہ جب یوکرین میں جنگ جاری تھی تھی عالمی منڈیوں میں پیٹرول اور ڈیزل کی قیمتیں بڑھی ہوئیں تھیں مگر عمران نیازی نے اپنی شہرت اور اگلی حکومت کو پھنسانے کے لیے جان بوجھ کر بجلی، پیٹرول اور ڈیزل کی قیمتیں سستی کیں۔
‏‎
وفاقی وزیر نے کہا کہ عمران خان نے جو قیمتیں سستی رکھیں اب معیشت کو پورا کرنے کے لیے اس کا بوجھ عوام پر آیا ہے۔

انہوں نے کہا کہ عمران نیازی نے عالمی مالیاتی فنڈ (آئی ایم ایف) سے جو معاہدہ کیا آج اس معاہدے کی وجہ سے ہاتھ باندھ کر معاملات طے کرنے پڑ رہے ہیں کیوں کہ آئی ایم ایف کہتا ہے کہ اس معاہدے پر سابق وزیر خزانہ حفیظ شیخ اور شوکت ترین نے دستخط کیے ہیں اور ہمیں پاکستان تحریک انصاف (پی ٹی آئی) کا نہیں بلکہ ہمیں پاکستانی حکومت کا پتا ہے۔

انہوں نے کہا کہ ہمارے پیروں میں بھی زنجیریں بندھی ہوئی ہیں اور ہم کوشش کر رہے ہیں کہ اس معاہدے کو برقرار رکھتے ہوئے ملک کے لیے جو بھی بہتر سے بہتر سہولت حاصل کر سکتے ہیں، کریں۔

‏‎وفاقی وزیر نے کہا کہ حکومت جو سخت فیصلے کر رہی ہے اس کا مقصد معیشت کو بچانا ہے۔