ایمازون کے جنگل میں لاپتہ برطانوی صحافی کے قتل کا انکشاف

Reading Time: 2 minutes

برازیل کے ایمازون جنگل میں لاپتہ ہونے والے برطانوی صحافی اور اس کے مقامی گائیڈ کو قتل کیے جانے کی تصدیق کر دی گئی ہے۔

ایسوسی ایٹڈ پریس کے مطابق برازیلین پولیس کی تفتیشی ٹیم نے کہا ہے کہ ایک مشتبہ شخص نے دو افراد کو قتل کرنے کا اعتراف کیا ہے جن میں سے ایک برطانوی صحافی تھا۔

گرفتار ملزم پولیس افسران کو اس مقام پربھی لے کر گیا جہاں لاشوں کو دفن کیا گیا تھا۔

پولیس افسران کے مطابق مرکزی ملزم نے اعتراف جرم کرتے ہوئے بتایا کہ پانچ جون کو لاپتہ ہونے والے دونوں افراد کو قتل کیے جانے کے بعد اُن کی کشتی کو غرقاب کیا گیا۔

برازیل کے فیڈرل انویسٹی گیٹر ایڈوارڈو الیگزینڈر فونٹس کے مطابق 41 سالہ ملزم اماریلڈو ڈا کوسٹا اولیوریا نے پولیس کو بتایا کہ انہوں نے مقامی شخص برونو پریرا اور برطانوی فری لانس صحافی ڈوم فلپس کو قتل کرنے کے لیے آتشیں اسلحہ استعمال کیا۔

تفتیشی حکام کے مطابق بدھ کو ملزم کی نشاندہی پر پولیس اس مقام پر پہنچی جہاں لاشوں کو دفن کیا گیا تھا اور وہاں سے مرنے والوں کی باقیات برآمد کی گئیں۔

’ہم نے باقیات شہر سے تین کلومیٹر ایک لکڑیوں کے ذخیرے سے برآمد کیں، تاہم ابھی تک حتمی طور پر ان کی شناخت نہیں ہو سکی۔‘

تفتیشی افسران کا کہنا تھا کہ ’اس کیس میں ملوث دیگر افراد کو بھی جلد گرفتار کر لیا جائے گا۔‘

ریاست امازونس کے پولیس حکام کے مطابق لاپتہ ہو جانے والے افراد کی کشتی ابھی تک نہیں ملی تاہم پولیس کو اس علاقے کا علم ہو چکا ہے جہاں ملزموں نے اس کو غرقاب کیا۔

حکام نے بتایا کہ ’ملزمان نے کشتی میں کوڑے کے بڑے بڑے تھیلے رکھ دیے تھے جس کے باعث وہ ڈوب گئی تھی۔‘

41 سالہ پریرا اور 57 سالہ فلپس کو آخری بار جویری وادی میں دریا میں کشتی پر سفر کرتے دیکھا گیا تھا۔ اس علاقے کی سرحدیں پیرو اور کولمبیا کے ساتھ ملتی ہیں، اس علاقے میں مچھیروں، شکاریوں اور سرکاری ایجنٹوں کے درمیان جھگڑوں میں پرتشدد واقعات بھی ہوتے رہے ہیں۔

مذکورہ افراد کے لاپتہ ہو جانے کے بعد معلومات اس وقت سامنے آنا شروع ہوئیں جب شک کی بنا پر ایک شخص کو گرفتار کیا گیا۔

پولیس کی جانب سے بتایا گیا تھا کہ واقعے سے تعلق کے شبے میں ایک اور ملزم کو بھی گرفتار کیا گیا، جس کی شناخت اونیا دی کوسٹا اولیوریا کے نام سے ہوئی۔