سمگلنگ کیس کا فیصلہ، اسلام آباد میں 10 کلو سونا بحق سرکار ضبط

Reading Time: < 1 minute

اسلام آباد کی کسٹم کلکٹر عدالت نے دس کلو گرام سونا سمگلنگ کیس کا فیصلہ سناتے ہوئے مہنگی دھات کو بحق سرکار ضبط کرنے کا حکم دیا ہے۔

کسٹم کلکٹر عدالت نے سونا بحق سرکار ضبط کرنے کا حکم جاری کرتے ہوئے کہا کہ افغان خاتون ملکیت اور قانونی جواز پیش کرنے میں ناکام رہیں۔

دس کلو گرام سونا 18جنوری کو افغان خاتون سوہیلہ الوکوزے اور ان کے بھائی حیواد خان خالدی سے برآمد ہوا تھا۔

افغان بہن بھائی سونا پشاور ایئرپورٹ سے دبئی سمگل کر رہے تھے۔

کسٹم کلکٹر کے مطابق ضبط کیے گئے دس کلو گرام گولڈ کی قیمت 110 ملین یا گیارہ کروڑ روپے بنتی ہے۔

عدالت کے مطابق افغان خاتون سے سونا پشاور ایئر پورٹ پر اے ایس ایف اور کسٹم حکام نے برآمد کیا تھا اور وہ بڑی مالیت کا گولڈ ساتھ لے جانے کوئی قانونی جواز پیش نہ کر سکی۔

کسٹم کلکٹر عدالت کے مطابق حکام نے پشاور ایئر پورٹ پر افغان بہن بھائی سے گولڈ برآمد کر کے ان کے پاسپورٹ ضبط کیے تھے۔

افغان خاتون کی جانب سے کسٹم عدالت میں پیش کی گئی رسیدیں بھی جعلی ثابت ہوئیں۔

کسٹم کلکٹر زاہد علی بیگ کی عدالت نے پانچ ماہ سماعت کے بعد مقدمے کا فیصلہ سنایا۔

کسٹمز ذرائع کے مطابق افغان خاتون نے بعد ازاں کسی طرح پاسپورٹ حاصل کر لیا اور دبئی فرار ہو گئیں۔