شہباز گل کیس میں پولیس کو پیر تک ریکارڈ پیش کرنے کی ہدایت

پاکستان کے دارالحکومت اسلام آباد کی مقامی عدالت نے تحریک انصاف کے رہنما شہباز گل کی ضمانت قبل از گرفتاری کی درخواست پر پولیس کو ریکارڈ پیش کرنے کا آخری موقع دیتے ہوئے سماعت پیر تک ملتوی کر دی۔

ہفتے کو ایڈیشنل سیشن جج طاہر محمود سپرا نے کیس کی سماعت کی۔ پولیس نے شہباز گِل کیس کا ریکارڈ عدالت میں پیش نہ کیا۔

پولیس حکام نے بتایا کہ تفتیشی افسر سے رابطہ ہوا تھا لیکن ابھی وہ پہنچا نہیں ہے،تفتیشی کا فون اب بند ہے رابطہ نہیں ہو رہا،ہم ابھی عدالتی حکم کے مطابق پھر معلوم کر کے بتا دیتے ہیں۔

پراسیکیوٹر رضوان عباسی نے کہا کہ ابھی ریکارڈ پیش ہو بھی جائے تو میں دلائل نہیں دے سکتا،میں نے بھی ریکارڈ دیکھنا ہے میری بھی ابھی تیاری نہیں ہے۔

انہوں نے کہا کہ پیر کیلئے کیس رکھ لیں ہم پیش ہو جائیں گے پراسیکیوٹر رضوان عباسی

شہباز گل کے وکیل نےُکہا کہ بہت زیادتی کی بات ہے کہ پولیس مسلسل تاخیر کر رہی ہے۔

فاضل جج نے ریمارکس دیئے کہ پولیس کو پھر آخری موقع دے دیتے ہیں،جس کے بعد مذکورہ حکم جاری کر دیا۔