عمران خان کے بغیر ثبوت الزامات انتہائی غیرذمہ دارانہ ہیں: فوجی ترجمان

Reading Time: < 1 minute

پاکستان کی فوج کے ترجمان نے تحریک انصاف کے چیئرمین عمران خان کو بیانات کو انتہائی غیرذمہ دارانہ قرار دیا ہے۔

پیر کو ایک بیان میں فوج کے شعبہ تعلقات عامہ (آئی ایس پی آر) نے کہا کہ پی ٹی آئی کے چیئرمین نے بغیر ثبوت انتہائی بے بنیاد اور من گھڑت الزامات عائد کیے۔

آئی ایس پی آرکا کہنا تھا کہ چیئرمین پی ٹی آئی نے بغیر ثبوت حاضر سروس سینئر فوجی افسر پر الزام لگایا.

الزام من گھڑت، بدنیتی پر مبنی ہے، افسوسناک، قابل مذمت اور ناقابل قبول بھی ہے.

آئی ایس پی آر نے کہا کہ فوجی، انٹیلی جنس اہلکاروں کو اشتعال انگیزی، پروپیگنڈے کے ذریعے نشانہ بنایا جارہا ہے.

آئی ایس پی آر کے مطابق ایک سال سے فوجی اہلکاروں پر سیاسی مقاصد کے لیے الزامات لگائے جارہے ہیں.

فوجی ترجمان کے بیان کا مکمل ترجمہ:
چیئرمین پی ٹی آئی نے بغیر کسی ثبوت کے ایک حاضر سروس اعلیٰ فوجی افسر پر انتہائی غیر ذمہ دارانہ اور بے بنیاد الزامات عائد کیے ہیں۔

یہ من گھڑت اور بدنیتی پر مبنی الزامات انتہائی افسوسناک، قابل مذمت اور ناقابل قبول ہیں۔
یہ پچھلے ایک سال سے ایک مستقل نمونہ ہے جس میں فوجی اور انٹیلی جنس ایجنسیوں کے اہلکاروں کو سیاسی مقاصد کے حصول کے لیے اشتعال انگیزی اور سنسنی خیز پروپیگنڈے کے ذریعے نشانہ بنایا جاتا ہے۔

ہم متعلقہ سیاسی رہنما سے مطالبہ کرتے ہیں کہ وہ قانونی راستے کا سہارا لیں اور جھوٹے الزامات لگانا بند کریں۔

ادارہ واضح طور پر جھوٹے اور غلط بیانات اور پروپیگنڈے کے خلاف قانونی کارروائی کرنے کا حق محفوظ رکھتا ہے۔