یوٹیوبر عادل راجہ 8 گھنٹے بعد رہا، لندن پولیس نے موبائل ضبط کر لیا؟

پاکستانی فوج کے ریٹائرڈ میجر اور عمران خان کے مداح یوٹیوبر عادل راجہ کو لندن پولیس نے 8 گھنٹے حراست میں رکھنے کے بعد رہا کر دیا ہے۔

بدھ کو عادل راجہ کے وکیل مہتاب عزیز نے تصدیق کی کہ پوچھ گچھ کے بعد اُن کے مؤکل کو رہا کیا گیا ہے۔

عادل راجہ کو دہشت گردی کی حوصلہ افزائی کے شبہے میں پولیس نے حراست میں لیا تھا۔

وکیل کے مطابق عادل راجہ کے موبائل اور لیپ ٹاپ کو پولیس نے قبضے میں لیا ہے۔

لندن پولیس عام طور پر ملزمان کو حراست میں لینے کے بعد ضمانت پر رہا کرتی ہے۔

عادل راجہ پاکستان میں حکومت کی تبدیلی کے بعد لندن چلے گئے تھے۔

اُن کے خلاف پاکستان میں متعدد مقدمات درج ہیں۔

وہ پاکستان میں عمران خان کی حمایت کرتے ہوئے فوج اور اُس کے اعلٰی عہدیداروں پر اپنے یوٹیوب چینل کے ذریعے سنگین الزامات عائد کرتے رہتے ہیں۔