پلاسٹک سرجری سے پیچیدہ امراض، معروف اداکارہ و ماڈل کا انتقال

Reading Time: < 1 minute

ارجنٹائن کی معروف اداکارہ اور ماڈل سلوینا لونا کو پلاسٹک سرجری کروانے کے بعدانتقال کر گئیں.

سرجری کے باعث ہونے والے پیچیدگی سے ان کو گُردوں کا مرض لاحق ہو گیا تھا اور وہ کئی برس تک اس کا شکار رہیں۔

عالمی ذرائع ابلاغ کے مطابق ان کی عمر 43 برس تھی اور وہ 2011 سے اس مرض میں مبتلا تھیں۔

سلوینا لونا کے وکیل فرنینڈو برلانڈو نے ان کی موت کی تصدیق کرتے ہوئے بتایا کہ ’وہ لائف سپورٹ پر زندہ تھیں اور ان کے خاندان والوں نے اسے منقطع کروانے کا فیصلہ کیا۔‘

ان کے دوست اداکار گوستاو کونٹی نے انسٹاگرام پر لکھا کہ ’ہم نے ہمیشہ آپ سے پیار کیا، ہم ایک ہی راستے پر چلتے رہے اور میرے دل میں ہم ہمیشہ اکٹھے رہیں گے۔‘

سلوینا لونا گُردوں کے علاوہ بھی متعدد امراض کی شکار تھیں جو کاسمیٹک سرجری کی وجہ سے پیدا ہوئیں۔

یہ سرجری کئی برس پہلے اینیبال لوٹوکی نامی ڈاکٹر نے کی تھی جو اس وقت بدعنوانی کے مقدمے کا سامنا کر رہے ہیں۔

سلوینا لونا کو کِڈنی ٹرانسپلانٹ کی ضرورت تھی اور ہر ہفتے ان کے تین ڈائلسز ہوتے تھے۔

پلاسٹک سرجری کے بعد وہ جن امراض میں مبتلا تھیں وہ بہت کم لوگوں کو لاحق ہوتی ہیں، تاہم اس سے ملتی جلتی کئی اور اموات بھی ہوئی ہیں۔

رواں برس اپریل میں 34 برس کی ماڈل کرسٹینا ایشتن پلاسٹک سرجری کے بعد دل کا دورہ پڑنے سے ہلاک ہوئیں۔

اسی طرح مئی میں انڈین ٹی وی ایکٹریس چیتھانا راج بھی پلاسٹک سرجری کے بعد ہارٹ اٹیک سے ہلاک ہو ئیں۔