لاہور ہائیکورٹ کا فیصلہ، الیکشن میں تاخیر کی راہ ہموار؟

Reading Time: 2 minutes

لاہور ہائی کورٹ نے تحریک انصاف کی درخواست منظور کرتے ہوئے الیکشن کمیشن کے اس نوٹیفیکیشن کو معطل کر دیا ہے جس میں عام انتخابات 2024 کے لیے بیوروکریٹس کو ریٹرننگ آفیسر متعین کیا گیا تھا۔

جسٹس علی باقر نجفی نے رات گئے محفوظ کیا گیا فیصلہ تحریری طور پر جاری کیا۔

قانونی و انتخابی ماہرین کی ایک بڑی تعداد کی رائے میں اب اس پر لارجر بینچ بنے گا اور سماعت کے اختتام تک اگلے عام انتخابات کا شیڈول جاری نہیں ہو سکے گا۔

آصف زرداری اور مولانا فضل الرحمان پہلے ہی عام انتخابات کو آٹھ فروری سے آگے لے جانے پر رضامند نظر آتے ہیں۔

پانچ صفحات پر مشتمل اس فیصلے میں لاہور ہائی کورٹ نے قرار دیا ہے کہ بظاہر ایسا لگ رہا ہے کہ درخواست گزار کی جماعت (تحریک انصاف ) کو لیول پلینگ فیلڈ دستیاب نہیں۔ ’یہ بات سب پرعیاں ہے اور غیر جانبدار حلقے بھی اس بات کی تصدیق کر رہے ہیں۔‘

’(تحریک انصاف) کی ٹاپ لیڈر شپ یا تو جیلوں میں ہے یا انڈر گراونڈ چلی گئی ہے۔ اس جماعت کا پوری طرح الیکشن میں حصہ لینا ایک سوالیہ نشان ہے۔‘

فیصلے میں لاہور ہائی کورٹ نے لکھا ہے کہ بظاہر درخواست گزار کی یہ منطق درست ہے کہ الیکشن کمیشن نے ان انتظامی افسران کو ڈسٹرکٹ ریٹرننگ، ریٹرننگ اور اسسٹنٹ ریٹرننگ افسران متعین کیا ہے جو اس وقت بھی ملک بھر میں انتظامی معاملات کو سنبھالے ہوئے ہیں۔

فیصلے کے مطابق درخواست گزار کی جماعت کو اس انتظامیہ پر پہلے ہی بھروسہ نہیں۔ اس میں کوئی شک نہیں انتخابات کے انعقاد پر قومی خزانے پر اربوں روپے خرچ ہوتے ہیں۔
’اگر سیاسی جماعتیں ایسے عمل کو تسلیم ہی نہ کریں تو یہ وقت اور پیسے کا ضیاع ہو گا۔ یہ الیکشن کمیشن کی ذمہ داری ہے کہ تمام سیاسی جماعتوں کو ایک ہی طرح کے مواقع فراہم کرے۔‘

فیصلے میں کہا گیا ہے کہ ان تمام معاملات کو مدنظر رکھتے ہوئے اور اس کیس کے قانونی اور تکنیکی پہلووں کی بدولت اس کیس کی فائل واپس چیف جسٹس لاہور ہائی کورٹ کو بجھوایا جا رہا ہے تاکہ وہ اس پر ایک لارجر بینچ تشکیل دیں۔

اس کیس کے حتمی فیصلے تک الیکشن کمیشن کی جانب سے انتظامی افسران کو آر اوز لگائے جانے کے تمام نوٹفیکیشن معطل رہیں گے۔

خیال رہے کہ پاکستان تحریک انصاف نے الیکشن کمیشن کی جانب سے آر اوز کی تعیناتی کو چلینج کر رکھا تھا۔