تاریخ رقم، کیپ ٹاؤن ٹیسٹ کا دو دن میں فیصلہ

Reading Time: < 1 minute

جنوبی افریقہ اور انڈیا کے درمیان دو ٹیسٹ میچوں پر مشتمل سیریز کے دوسرے میچ میں انڈیا نے جنوبی افریقہ کو 7 وکٹوں سے شکست دے دی۔

کیپ ٹاؤن میں بدھ سے شروع ہونے والا ٹیسٹ میچ دوسرے دن ہی ختم ہوگیا جس کے بعد دونوں ٹیموں کے درمیان سیریز 1-1 سے برابر ہوگئی ہے۔

ٹیسٹ میچ کے دوسرے دن جنوبی افریقہ کی جانب سے دیے گئے 79 رنز کے ہدف کو انڈیا نے تین وکٹوں کے نقصان پر پورا کر لیا۔

دوسری اننگز میں انڈیا کی جانب سے یاشسوری جیسوال نے 28، کپتان روہت شرما نے 16 اور وراٹ کوہلی نے 12 رنز بنائے۔

دوسری اننگز میں بولنگ کرتے ہوئے کاگیسو رباڈا، ناندرے برگر اور مارکو یانیسن نے ایک ایک وکٹ حاصل کی۔
اس سے قبل جنوبی افریقہ کی پوری ٹیم اپنی دوسری اننگز میں 176 رنز بنا کر آؤٹ ہوگئی تھی۔

جنوبی افریقہ کی جانب سے دوسری اننگز میں ایڈن مارکرم 106 رنز بنا کر نمایاں رہے جبکہ کپتان ڈین ایلگر نے 12 اور ڈیوڈ بیڈنگھم نے 11 رنز بنائے۔

انڈیا کی طرف سے دوسری اننگز میں جسپریت بمراہ نے 6، مکیش کمار نے 2 جبکہ محمد سراج نے ایک وکٹ حاصل کی۔