ٹیسٹ سیریز انڈیا کے نام، انگلش بولر اینڈرسن کی 700 وکٹیں

Reading Time: 2 minutes

انڈیا نے انگلینڈ کو پانچ ٹیسٹ میچوں پر مشتمل سیریز کے آخری میچ میں ایک اننگز اور 64 رنز سے شکست دے کر سیریز 1-4 سے جیت لی۔

دھرم شالہ میں کھیلے گئے پانچویں ٹیسٹ کے تیسرے دن انگلینڈ کی پوری ٹیم اپنی دوسری اننگز میں 195 رنز پر آؤٹ ہوگئی۔

انگلیںڈ کی جانب سے دوسری اننگز میں جو رُوٹ نے 84، جونی بیئرسٹو نے 39 اور ٹام ہارٹلی نے 19 رنز بنائے۔

انڈیا کی جانب سے رویچندرن اَشوِن نے پانچ جبکہ جسپریت بمراہ اور کلدیپ یادو نے دو دو وکٹیں حاصل کیں۔

اس سے قبل انگلینڈ نے جمعرات کو ٹاس جیت کر پہلے بیٹنگ کا فیصلہ کیا جس کے بعد پوری انگلش ٹیم پہلی اننگز میں 218 رنز بنا کر آؤٹ ہوگئی۔

انگلینڈ کی جانب سے پہلی اننگز میں زیک کرالی نے 79، جونی بیئرسٹو نے 29 اور بین ڈکٹ نے 27 سکور بنائے۔

انڈیا کی طرف سے پہلی اننگز میں کلدیپ یادو نے پانچ، رویچندرن اَشِون نے چار اور رویندرا جڈیجہ نے ایک وکٹ حاصل کی۔

اس کے جواب میں انڈین ٹیم اپنی پہلی اننگز میں 477 رنز بنا کر آؤٹ ہوگئی۔

انڈیا کی جانب سے پہلی اننگز میں شبھمن گِل نے 110، کپتان روہت شرما نے 103 اور دیودت پڈیکل نے 65 رنز بنائے۔

انگلینڈ کی طرف سے پہلی اننگز میں شعیب بشیر نے پانچ جبکہ جیمز اینڈرسن اور ٹام ہارٹلی نے دو دو کھلاڑیوں کو آؤٹ کیا۔

اس میچ میں جیمز اینڈرسن نے تاریخ رقم کرتے ہوئے اپنے عظیم ٹیسٹ کیریئر کی 700ویں وکٹ بھی حاصل کر لی۔

41 برس کے جیمز اینڈرسن نے یہ اعزاز اپنے 187ویں ٹیسٹ میچ میں کلدیپ یادو کو آؤٹ کر کے حاصل کیا۔

وہ ٹیسٹ کرکٹ کی دنیا میں 700 وکٹیں حاصل کرنے والے پہلے فاسٹ بولر بن گئے۔

اسی طرح وہ یہ سنگ میل عبور کرنے والے دنیا کے تیسرے بولر بن گئے ہیں۔

ان کے علاوہ سری لنکا کے سابق عظیم سپنر مُتایا مرلی دھرن 800 جبکہ عظیم آسٹریلوی سپنر شین وارن 708 وکٹیں حاصل کر چکے ہیں۔

جیمز اینڈرسن نے اپنے ٹیسٹ کیریئر کا آغاز 22 مئی 2003 کو زمبابوے کے خلاف لارڈز کے تاریخی سٹیڈیم میں کیا تھا جس کے بعد وہ اب تک 187 ٹیسٹ میچ کھیل چکے ہیں۔