لاہور پولیس کے اہلکار کی گداگر خاتون سے دست درازی، روکنے والے شہری پر فائرنگ

Reading Time: < 1 minute

لاہور میں گداگر خاتون سے دست درازی کرنے والے پولیس اہلکار کے خلاف تھانہ مناواں میں مقدمہ درج کر لیا گیا ہے۔

اتوار کو جاری کیے گئے بیان کے مطابق ڈی آئی جی آپریشنز نے واقعے کا نوٹس لیتے ہوئے ملوث اہلکار کے خلاف مقدمہ درج کیا ہے۔

پولیس کے ترجمان نے کہا ہے کہ اہلکار نے بھاگنے کی کوشش میں شہری ساجد پر فائر بھی کیا جو اُن کی ٹانگ پر لگا۔

زخمی شہری کو طبی امداد کے لیے فوری طور پر ہسپتال منتقل کیا گیا جس کی حالت خطرے سے باہر ہے۔

متاثرہ شہری ساجد کی مدعیت میں نامزد ملزم امجد کے خلاف مقدمہ درج کیا گیا۔

ڈی آئی جی آپریشنز کا کہنا ہے کہ واقعے میں ملوث گرفتار اہلکار امجد تھانہ شفیق آباد میں تعینات ہے۔

انہوں نے کہا کہ پولیس اہلکار کے خلاف محکمانہ کاروائی کا عمل بھی شروع کر دیا گیا ہے، اور سخت سے سخت قانونی اور محکمانہ کاروائی عمل میں لائی جائے گی۔

ڈی آئی جی نے کہا کہ ایک اہلکار کی قانون کی خلاف ورزی پوری فورس کی بدنامی کا باعث بنتی ہے، محکمے میں موجود کالی بھیڑوں سے پولیس فورس کا کوئی تعلق نہیں۔

فیصل کامران کا کہنا تھا کہ کڑی ڈیوٹی کرنے والی فورس کی بدنامی کا باعث بننے والوں کی جگہ جیل ہے۔