پاکستانی فوج کا افغانستان سے داغے گئے چار ڈرونز کو ناکام بنانے کا دعویٰ

پاکستان کی فوج نے دعویٰ کیا ہے کہ منگل کی شب افغان طالبان حکام کی جانب سے صوبہ بلوچستان پر داغے گئے چار سادہ نوعیت کے ڈرونز کو تباہ کر دیا گیا۔

بدھ کو فوج کے شعبۂ تعلقاتِ عامہ (آئی ایس پی آر) کی جانب سے جاری کردہ اعلامیے میں کہا گیا ہے کہ پاکستان کے فضائی دفاعی نظام نے ’بروقت‘ ان ڈرونز کی نشاندہی کی اور جوابی اقدام کرتے ہوئے اُن کو ’کامیابی کے ساتھ بے اثر‘ کر دیا۔

پاکستانی فوج کی جانب سے یہ اعلامیہ افغان وزارت دفاع کے اُس بیان کے کچھ ہی دیر بعد جاری کیا گیا جس میں دعویٰ کیا گیا تھا کہ ’افغان فضائیہ نے پاکستان کے صوبے بلوچستان کے ضلع پشین اور خیبر پختونخوا کے مختلف مقامات پر داعش کے مبینہ مراکز کو نشانہ بنایا ہے۔‘

افغان وزارت دفاع نے کہا کہ ’بلوچستان کے علاقے سرانان میں ایک ایسے مرکز پر فضائی حملہ کیا گیا، جسے افغانستان میں تخریبی سرگرمیوں اور حملوں کی منصوبہ بندی کے لیے استعمال کیا جا رہا تھا۔‘

اس کارروائی سے قبل اتوار (28 جون) کی شب پاکستانی فورسز نے افغانستان کے علاقوں پکتیکا، پکتیا اور کنڑ میں جماعت الاحرار اور تحریک طالبان پاکستان سے منسلک تین اہداف کو نشانہ بناتے ہوئے 25 شدت پسندوں کو ہلاک کرنے کا دعویٰ کیا تھا، تاہم افغان حکام اور افغانستان میں اقوام متحدہ کے مشن (یوناما) کا کہنا ہے پاکستانی حملوں میں دو درجن سے زائد عام شہری مارے گئے ہیں۔

ادھر پشاور کے مضافاتی علاقے حسن خیل میں مبینہ طور پر ایک کاپٹر ڈرون کا ملبہ گرنے کے نتیجے میں دو بچوں سمیت ایک ہی خاندان کے پانچ افراد زخمی ہوئے ہیں۔

کوئٹہ میں‌ بھی گرائے گئے ڈرونز کے ملبے سے دو شہریوں کے زخمی ہونے کی اطلاعات ہیں-