فاروق ستار کے کاغذاتِ نامزدگی مسترد

Reading Time: < 1 minute

کراچی میں قومی اسمبلی کے حلقہ این اے 245 سے متحدہ قومی موومنٹ کے رہنما ڈاکٹر فاروق ستار کے کاغذاتِ نامزدگی ریٹرننگ افسر نے مسترد کر دیے ہیں ۔ فاروق ستار اپنے کاغذاتِ نامزدگی کی جانچ پڑتال کے لیے ہونے والی سماعت میں ریٹرننگ افسر کے سامنے پیش نہ ہوئے ۔

پولیس نے فاروق ستار کے بارے میں اپنی رپورٹ جمع کرائی ۔ ایس ایس پی کی جانب سے جمع کرائی گئی رپورٹ میں کہا گیا کہ  فاروق ستار کے خلاف متعدد مقدمات ہیں، انہیں عدالت مفرور قرار دے چکی ہے اور ان کے وارنٹِ گرفتاری بھی جاری کیے ہوئے ہیں، فاروق ستار نے کاغذات نامزدگی میں مقدمات کا ذکر نہیں کیا ۔

ریٹرننگ افسر نے فاروق ستار کے پیش نہ ہونے پر برہمی کا اظہار کیا ۔ ریٹرننگ افسر نے کاغذاتِ نامزدگی مسترد کرنے کا فیصلہ دیتے ہوئے کہا کہ  ڈاکٹر فاروق ستار نے حقائق چھپائے اور کاغذات نامزدگی میں اپنے خلاف درج مقدمات کا ذکر نہیں کیا، انہوں نے دو ایف آئی آرز ظاہر نہیں کیں، ایم کیو ایم کے رہنما مقدمات کا سامنا کرنے کی بجائے مفرور ہوگئے ۔

فاروق ستار نے کراچی سے قومی اسمبلی کے تین حلقوں این اے 241، 245 اور 247 سے کاغذات نامزدگی جمع کرائے ہیں ۔