تربیلا کے چوتھے توسیعی منصوبے سے پیداوار
Reading Time: 2 minutesتربیلا چوتھے توسیعی منصوبے کے تینوں پیداواری یونٹس کابیک وقت لوڈ ری جیکشن ٹیسٹ کامیابی کے ساتھ کر لیا گیا ہے ۔ بیک وقت لوڈ ری جیکشن ٹیسٹ پن بجلی منصوبے کی تکمیل اور تمام پیداواری یونٹ فعال ہونے پر کیا جاتا ہے ۔
حکام کے مطابق بین الاقوامی ماہر کی زیر نگرانی گزشتہ ہفتے منصوبے کا ٹربائن ایفی شینسی ٹیسٹ بھی کیا گیا ۔ ایفی شینسی ٹیسٹ کے دوران ٹربائن کی کارکردگی ماڈل ٹیسٹنگ کے دوران سامنے آنے والی کارکردگی سے بہتر پائی گئی ۔
تربیلا چوتھا توسیعی منصوبہ پیداواری آغاز سے اب تک قومی نظام کو ایک ارب 26کروڑ یونٹ سستی پن بجلی مہیا کرچکا ہے ۔ تربیلا چوتھے توسیعی منصوبے اور نیلم جہلم کی بدولت پیک آورزکے دورا ن پن بجلی کی پیداوار میں گزشتہ سال کی نسبت 46 فیصد اضافہ ریکارڈ کیا گیا
بتایا گیا ہے کہ 24 نومبر 2018 کو تربیلا چوتھے توسیعی منصوبے کے تینوں پیداواری یونٹس کامیابی کے ساتھ بیک وقت لوڈ ری جیکشن ٹیسٹ کیا گیا۔ لوڈری جیکشن ٹیسٹ تقریباَ ایک ہزار ایک سو میگاواٹ کے لوڈ پر منصوبے کے کنسلٹنٹس اور کنٹریکٹر کی نگرانی میں کیا گیا۔ ہائیڈرو پاور منصوبوں کے بیک وقت لوڈ ری جیکشن ٹیسٹ کا مقصد زیر آب آلات کی پائیداری اور ٹربائنوں کی رفتار اور پریشر میں اضافہ کو جانچنا ہوتا ہے ۔ یہ ٹیسٹ پن بجلی منصوبے کی تکمیل اور اس کے تمام پیداواری یونٹ فعال ہونے پر کیا جاتا ہے۔
تربیلا چوتھے توسیعی منصوبے اور نیلم جہلم ہائیڈرو پاور پراجیکٹ کی رواں سال تکمیل سے پن بجلی کی مجموعی پیداوار میں خاطر خواہ اضافہ ریکارڈ کیا گیا ہے۔ گزشتہ روز پیک آورز کے ودران پن بجلی کی مجموعی پیداوار 5ہزار 241 میگا واٹ رہی، جو کہ گزشتہ سال اسی روز 3ہزار 581 میگا واٹ تھی۔ گزشتہ سال کی نسبت یہ اضافہ 46 فیصد ہے۔
تربیلا چوتھا توسیعی منصوبہ بجلی کی پیداوار کے آغاز سے اب تک رواں سال پانی کی کم آمد کے باوجود نیشنل گرڈ کو ایک ارب 26کروڑ یونٹ سستی پن بجلی مہیا کرچکا ہے۔
تربیلا چوتھا توسیعی منصوبہ تربیلا ڈیم کی سرنگ نمبر 4پر تعمیر کیا گیا ہے۔منصوبے کی مجموعی پیداواری صلاحیت ایک ہزار 410میگاواٹ ہے۔ اس کے تین پیداواری یونٹ ہیں اور ہر یونٹ کی پیداواری صلاحیت 470میگاواٹ ہے۔تربیلا کے چوتھے توسیعی منصوبے کی بدولت تربیلا ہائیڈل پاور سٹیشن کی پیداواری صلاحیت 3 ہزار 478 میگاواٹ سے بڑھ کر 4 ہزار 888 میگاواٹ
ہو گئی ہے ۔منصوبے سے ہر سال تقریبا 3 ارب 84 کروڑ یونٹ سستی پن بجلی حاصل ہوگی ۔ منصوبے سے آمدنی کا تخمینہ 30 ارب روپے سالانہ ہے ۔
