پاکستان: چاروں صوبوں میں کورونا پھیل گیا

پاکستان کے چاروں صوبوں میں کورونا کے مریض سامنے آئے ہیں اور کل تعداد 184 ہو گئی ہے۔

صوبہ سندھ میں کورونا کے مریضوں کی تعداد سب سے زیادہ ہے جبکہ خیبر پختونخوا میں 15 افراد کے ٹیسٹ مثبت آئے ہیں۔ پنجاب میں وائرس کا شکار افراد کی تعداد دو ہو گئی ہے۔

پیر کو سندھ حکومت نے تصدیق کی تھی کہ سکھر کے علاقے میں جتنے بھی افراد کے ٹیسٹ کیے گئے ان میں سے آدھے کے نتائج مثبت آئے ہیں۔

ادھر اسلام آباد میں وزیراعظم عمران خان کی زیرصدارت کورونا وائرس کی روک تھام کے لیے نیشنل کوآرڈی نیشن کمیٹی کا اجلاس ہوا جس میں مؤثر حکمت عملی تشکیل دینے پر گفتگو ہوئی۔

واضح رہے کہ اختتام ہفتہ نیشنل سکیورٹی کمیٹی کے اجلاس میں کورونا کے مسئلے پر فوجی حکام نے شرکت کر کے بریفنگ دی تھی۔

قبل ازیں ترجمان مرتضی وہاب نے بتایا تھا کہ تفتان سے سکھر آنے والے مزید 50 افراد میں وائرس کی تصدیق ہوئی۔

خیبر پختونخوا میں بھی جن افراد میں کورونا وائرس کے ٹیسٹ کا نتیجہ مثبت آیا ہے وہ تفتان کے راستے ایران سے زیارات کے بعد واپس آئے ہیں۔

More results have come in. So far 50 people who had arrived in Sukkur from Taftaan have tested positive, 25 at Karachi & 1 at Hyderabad. So the total patients have reached 76 in Sindh. Out of these 76 patients, 2 have recovered & the remaining 74 are being kept in isolation

— Murtaza Wahab Siddiqui (@murtazawahab1) March 16, 2020

اتوار کو سندھ میں 19 جبکہ لاہور میں ایک مریض کی تصدیق ہوئی تھی۔

اس وقت سندھ میں کورونا سے متاثرہ افراد کی تعداد 159ہو گئی ہے جبکہ ملک میں وائرس کا شکار افراد 184 ہو گئے ہیں۔

سندھ حکومت کے مطابق ایرانی زیارات سے سکھر آنے والے 291 افراد کو الگ تھلگ رکھا گیا ہے۔ تفتان کے راستے آنے والے ان زائرین میں سے نصف کے کورونا نتائج مثبت آئے ہیں جبکہ دیگر کے ٹیسٹ رپورٹ کا انتظار ہے۔