وائرس داغستان تک پہنچ گیا، پہلا کیس

Reading Time: < 1 minute

دنیا کے 196 ملکوں میں ساڑھے پانچ لاکھ افراد کو متاثر اور 24 ہزار سے زائد کی ہلاکت کا سبب بننے والا کورونا وائرس داغستان کی ریاست تک پہنچ گیا ہے۔

روسی خبر رساں ادارے طاس کے مطابق شمالی داغستان میں کورونا کا پہلا کیس سامنے آیا ہے۔ ریاست کے ایک رکن پارلیمان کا کورونا کا ٹیسٹ مثبت آیا ہے۔

جمہوریہ داغستان میں حکام نے تصدیق کی ہے کہ متاثرہ قانون ساز کا ٹیسٹ روسی دارالحکومت ماسکو بھیجا گیا تھا جہاں سے اس کے مثبت ہونے کے بارے میں معلوم ہوا ہے۔

واضح رہے کہ دنیا میں کورونا کے پھیلنے کو روکنے کے لیے ہر ملک میں مختلف طریقوں سے شہریوں کو گھروں میں بیٹھے رہنے اور سفر نہ کرنے کے لیے کہا گیا ہے۔

چین سے گزشتہ سال دسمبر کے وسط میں پھوٹنے والی وبا نے یورپ میں اٹلی و سپین کو سب سے زیادہ متاثر کیا ہے جبکہ امریکہ میں بھی وائرس سے 13 سو سے زائد افراد ہلاک ہو چکے ہیں۔