کوکین سے بھرے جہاز کی ہائی وے پر کریش لینڈنگ

میکسیکو کے فوجی حکام نے کہا ہے کہ انہوں نے یوکاتان کے علاقے میں جنوبی امریکہ سے آنے والے چھوٹے جہاز کو ہائی وے پر غیر قانونی لینڈنگ کے بعد آگ کے شعلوں میں گھرے دیکھا جو ممکنہ طور پر منشیات لے کر آیا تھا۔

حکام کے مطابق قریب ہی ان کو ایک ٹرک بھی ملا جس میں 30 کلو سے زائد کوکین تھی جو وہ جہاز سے لے کر نکلا تھا۔

فوجی حکام کے مطابق جہاز وینزویلا سے آیا تھا اور منشیات کی مالیت 50 لاکھ ڈالر کے لگ بھگ ہے۔

حکام کا کہنا ہے کہ منشیات کے بین الاقوامی گروہ کے لیے یہ ایک بڑا نقصان ہے۔

یہ واضح نہیں کہ جہاز کو لینڈنگ کے بعد سمگلروں نے خود آگ لگائی یا وہ خرابی کا شکار ہوا۔

میکسیکو اور جنوبی امریکہ کے ملکوں میں کروڑوں ڈالر کی منشیات کے کاروبار میں سمگلر چھوٹے جہازوں کو استعمال کرتے ہیں جو کم اونچی پر اڑان بھرتے ہوئے ریڈار سے بچ کر دوسرے ملکوں میں غیر قانونی رن ویز پر لینڈنگ کرتے ہیں۔