پہلے ٹیسٹ میں ویسٹ انڈیز نے انگلینڈ کو ہرا دیا

عالمی وبا کورونا کے دوران دنیائے کرکٹ کی پہلی سیریز کھیلی جا رہی ہے جہاں ویسٹ انڈیز نے انگلینڈ کو ساؤتھمپٹن ٹیسٹ میں چار وکٹوں سے شکست دے دی۔

انگلینڈ میں کھیلی جانے والی کرکٹ سیریز کے پہلے ٹیسٹ کے آخری دن ویسٹ انڈیز کو جیتنے کے لیے دو سو رنز کا ہدف ملا۔

ویسٹ انڈیز کی جانب سے جرمین بلیک وڈ نے 95 رنز کی اننگز کھیلی۔

ہدف کے تعاقب میں ویسٹ انڈیز کو ابتدا میں مشکلات کا سامنا کرنا پڑا جب ٹیم کے تین کھلاڑی صرف 27 کے سکور پر پویلین لوٹ گئے۔ تاہم بلیک وڈ انگلینڈ کے بولرز کے سامنے ڈٹ گئے۔

جرمین بلیک وڈ ویسٹ انڈیز کی فتح سے 11 رنز قبل بن سٹوک کی گینڈ پر آؤٹ ہوئے۔ ویسٹ انڈیز نے مطلوبہ ہدف چھ وکٹوں کے نقصان پر پورا کر لیا۔

اس سے قبل انگلینڈ کی ٹیم دوسری اننگز میں 313 رنز بنا کر آؤٹ ہوگئی۔

ساؤتھمپٹن ٹیسٹ میں فتح کے ساتھ ویسٹ انڈیز کو تین میچوں کی سیریز میں ایک صفر کی برتری حاصل ہوگئی۔

ویسٹ انڈیز نے انگلینڈ کی پہلی اننگز کے اسکور 204 رنز کے جواب میں 318 رنز بنا کر پہلی اننگز میں 114 رنز کی برتری حاصل کرلی تھی۔

سابق انڈین بلے باز سچن ٹنڈولکر نے میچ پر تبصرہ کرتے ہوئے بلیک وڈ کو خراج تحسین پیش کیا ہے۔

Good all-round performances by players from both teams.
Jermaine Blackwood played a crucial knock in a tense situation to see @windiescricket through. An important win which has set up the series perfectly. #ENGvWI pic.twitter.com/PLbJlqIe8c

— Sachin Tendulkar (@sachin_rt) July 12, 2020

ویسٹ انڈیزکے کپتان جیسن ہولڈر نے پہلی اننگز میں اچھی بولنگ کا مظاہرہ کرتے ہوئے کیریئر کی بہترین کارکردگی دکھائی تھی اور چھ وکٹیں حاصل کیں۔