خاشقجی قتل کیس میں آٹھ سعودی اہلکاروں کو سزا

Reading Time: < 1 minute

سعودی صحافی جمال خاشقجی کے قتل میں ملوث آٹھ سعودی اہلکاروں کو دارالحکومت ریاض کی ایک فوجی عدالت نے سزا سنائی ہے۔

سعودی پبلک پراسیکیوشن کے ترجمان نے کہا ہے کہ صحافی جمال خاشقجی قتل کیس کے ملزمان کے خلاف حتمی فیصلہ جاری کردیا گیا ہے۔

سعودی عرب کی سرکاری پریس ایجنسی (ایس پی اے) کے مطابق ریاض کی فوجی عدالت نے آٹھ  افراد کو قتل کا مجرم قرار دیا ہے۔ یہ فیصلہ فوجداری قانون کی دفعہ 210 کے تحت حتمی ہے۔ 

پبلک پراسیکیوشن کے ترجمان نے بتایا کہ آٹھ افراد کو 124 برس قید کی سزائیں دینے کا فیصلہ کیا گیا ہے۔ پانچ افراد کو 20، بیس برس، ایک کو دس برس کی سزا ہوگی جبکہ دو کو سات، سات برس قید کی سزا سنائی گئی ہے۔

یاد رہے کہ سعودی صحافی جمال خاشقجی کو 2018 میں استنبول کے سعودی قونصلیٹ میں قتل کردیا گیا تھا۔

جمال خاشقجی امریکی اخبارات میں سعودی شاہی خاندان کے اندرونی اختلافات اور ولی عہد محمد بن سلمان کے اختیارات پر لکھتے تھے۔