جسٹس قاضی فائز کا جواب، جسٹس بندیال سے ملاقات کا بھی بتا دیا

Reading Time: < 1 minute

سپریم کورٹ کی جانب سے جسٹس قاضی فائز عیسیٰ سے پوچھے گئے تین سوالات پر ان کا دس صفحات پر مشتمل جواب عدالت میں جمع کروا دیا گیا۔

رپورٹ: جہانزیب عباسی

سپریم کورٹ میں جسٹس قاضی فائز عیسیٰ کی طرف سے جمع کرائے گئے جواب میں موقف اختیار کیا گیا ہے کہ حیران کن طور پر بینچ کے سربراہ جسٹس عمر عطا بندیال نے کچھ سوالات پوچھے۔

جواب میں کہا گیا ہے کہ ان سوالات کی بنیاد بظاہر چیئرمین ایف بی آر کی رپورٹ معلوم ہوتی ہے، میں اور میری اہلیہ چیئرمین ایف بی آر کی رپورٹ کو بے وقعت سمجھتے ہیں۔

تحریری جواب میں جسٹس قاضی فائز عیسیٰ نے مزید کہا کہ عدالت کی جانب سے تینوں سوالات پوچھے ہی نہیں جانے چاہئیں تھے،اگر میں ان سوالات کا جواب دیتا ہوں تو یہ ایف بی آر رپورٹ کو تسلیم کرنے اور اپنے کیس کو خراب کرنے کے مترادف ہے۔

جسٹس فائز کے مطابق نظرثانی درخواستوں کی سماعت کے دوران ایف بی آر رپورٹ پر بات کرنا نامناسب ہے،اگر میں نے سوالات کے جوابات دیئے تو اس سے میرے خلاف ایک اور ریفرنس بن سکتا ہے،ان سوالات کے جوابات کے بعد سپریم جوڈیشل کونسل کو ایف بی آر رپورٹ کی روشنی میں میرے خلاف کارروائی کا اختیار مل جائے گا۔

جسٹس قاضی فائز نے کہا کہ ”میں حلفاً کہتا ہوں کہ میں نے جسٹس عمر عطا بندیال سے ملاقات کر کے کبھی اپنے کیس پر بات نہیں کی، میں نے چیف جسٹس سے درخواست کی کہ میرا مقدمہ سننے والے کسی جج کو میرے ساتھ نہ بٹھایا جائے،جسٹس عمر عطا بندیال نے مجھے اپنے فارم ہاؤس کا شہد بطور تحفہ بھجوایا،میں نے شہد کی بوتل شکریہ کے ساتھ واپس کر دی۔“