’فاسٹلی‘ میں خرابی، دنیا کی بڑی ویب سائٹس متاثر

دنیا کی بڑی نیوز اور ای کامرس کی ویب سائٹس میں خرابی پیدا ہوئی ہے اور اس کی وجہ کلاؤڈ سرور بنا ہے.
منگل کی سہ پہر دنیا بھر میں ای کامرس اور عالمی نیوز ویب سائٹس تک رسائی متاثر ہوئی اور صارفین نے سوشل میڈیا پر اس حوالے سے اپنے تجربات سے آگاہ کیا.
بی بی سی، الجزیرہ، سی این این سمیت متعدد بین الاقوامی نیوز سائٹس پر جانے والے صارفین نے خرابی کی شکایت کی.
امریکی میڈیا پلیٹ فارمز سی این این، نیو یارک ٹائمز، بلومبرگ، برطانوی میڈیا پلیٹ فارمز گارڈین اور انڈی پینڈنٹ سمیت امریکی ای کامرس ویب سائٹ امیزون، انٹرٹینمنٹ اور سوشل پلیٹ فارمز سپوٹیفائی، ریڈٹ، شوپیفائی اور حکومت برطانیہ کی ویب سائٹ ان پلیٹ فارمز میں شامل ہیں جو کلی یا جزوی طور پر ڈاؤن رہیں۔

بعد ازاں دنیا کی بڑی کلاؤڈ سرور کمپنی فاسٹلی نے کہا کہ ان کے سسٹم میں خرابی پیدا ہو گئی تھی اور وہ دور کر لی گئی.

سوشل نیٹ ورکنگ پلیٹ فارمز بالخصوص ٹوئٹر پر مسئلے کی نشاندہی کرنے والوں کا کہنا تھا کہ وہ مذکورہ ویب سائٹ کھولنے کی کوشش کر رہے ہیں تاہم اس میں کامیاب نہیں ہو پا رہے، ایسے متعدد صارفین نے دکھائی دینے والے ایرر میسیج کو بھی دوسروں سے شیئر کیا۔