تجارتی مذاکرات ناکام،امریکہ میں کینیڈین مصنوعات پر 50 فیصد ٹیرف عائد

امریکہ نے کینیڈا کی کچھ مصنوعات پر 50 فیصد تک ٹیرف (درآمدی محصولات) عائد کر دیا ہے؛ یہ اقدام دونوں دیرینہ اتحادیوں کے درمیان تجارتی معاہدہ طے پانے میں ناکامی کے بعد اٹھایا گیا-

مذاکرات کے دوران دونوں فریقین نے ایک دوسرے پر متعدد بار بات چیت کو ناکام بنانے کا الزام عائد کیا۔

یہ ٹیرف، جومقامی وقت کے مطابق نصف شب کے فوراً بعد کینیڈا کی تقریباً 20 ارب ڈالر مالیت کی مصنوعات پر نافذ ہوئے—جن میں لکڑی کی آئس ہاکی سٹکس جیسی اشیاء شامل ہیں جن کا استعمال اب شاذ و نادر ہی ہوتا ہے—میکسیکو کے بعد امریکہ کے سب سے بڑے تجارتی شراکت دار کے لیے معاشی طور پر کوئی بہت بڑی تبدیلی یا فیصلہ کن موڑ ثابت نہیں ہوں گے۔ یہ مالیت امریکہ کو کی جانے والی کینیڈا کی کل برآمدات کا صرف 5 فیصد سے کچھ زیادہ حصہ بنتی ہے۔

تاہم نئے محصولات (ٹیرف) صدر ڈونلڈ ٹرمپ اور وزیراعظم مارک کارنی کے درمیان کشیدگی میں اضافے کا باعث بنے ہیں، اور امکان ہے کہ ان کی وجہ سے امریکہ، میکسیکو اور کینیڈا کے درمیان آزادانہ تجارت کے معاہدے کی تجدید کے لیے وسیع تر مذاکرات مزید مشکل ہو جائیں گے۔

کینیڈین وزیراعظم کارنی نے کہا کہ انہوں نے تجارتی مذاکرات معطل کر دیے ہیں اور کینیڈا نئے محصولات کے جواب میں "ڈالر کے بدلے ڈالر” (یعنی مساوی مالیت) کے حساب سے جوابی کارروائی کرے گا۔

وزیراعظم کارنی نے ایک بیان میں کہا کہ "میں نے امریکہ کے ساتھ تجارتی مذاکرات معطل کرنے کا فیصلہ کیا ہے اور کینیڈا کے مذاکرات کاروں کو ہدایت کی ہے کہ وہ اوٹاوا واپس آ جائیں۔”

کینیڈین وزیراعظم نے کہا کہ "انہوں نے (مذاکرات کاروں) نے ان مذاکرات کے دوران آخری لمحے تک کینیڈا کے عوام کے مفادات کے تحفظ کے لیے نیک نیتی اور سخت محنت سے کام کیا۔ تاہم، امریکہ کی جانب سے تجویز کردہ شرائط میں آخری لمحات میں کی جانے والی تبدیلیاں غیرمنصفانہ اور معاشی اعتبار سے نامناسب تھیں، اور انہوں نے کسی بھی معاہدے کے قابلِ اعتماد ہونے پر سوالیہ نشان لگا دیا۔”