چارٹرڈ فلائٹ سے 18 ٹن پاکستانی آم کس ملک پہنچے؟
Reading Time: < 1 minuteپاکستان کے دفترخارجہ نے انڈین ذرائع ابلاغ کی ان رپورٹس کو مسترد کیا ہے جن میں کہا گیا تھا کہ چین اور امریکہ سمیت کئی ممالک نے پاکستان کی جانب سے ’مینگو ڈپلومیسی‘ کے تحت بھیجے گئے آم لینے سے انکار کر دیا ہے۔
اتوار کو ترجمان دفتر خارجہ زاہد حفیظ چوہدری نے ایک بیان میں کہا کہ ’ہم نے انڈین میڈیا میں کچھ غیر ملکیوں کو پاکستانی آم بھجوانے کی رپورٹس دیکھی ہیں۔‘
ترجمان کے بیان کے مطابق ان رپورٹس کو حقیقت کے برخلاف اور حقائق کے منافی قرار دیتے ہوئے مسترد کرتے ہیں۔ انڈین میڈیا نے غلط اور غیر ذمہ دارانہ خبریں چلائی۔‘
ترجمان کا کہنا تھا کہ ہر برس پاکستان کے صدر بہترین اور معیاری آم بعض چنیدہ ممالک کو بھیجتے ہیں۔ ’یہ آم اچھی شہرت اور تجارتی سفارت کاری کے فروغ کے لیے اچھی ساکھ کے طور پر بھیجے جاتے ہیں۔‘
ترجمان کے مطابق وزارت خارجہ آم بھیجنے کے لیے ممالک کی فہرست ان کے کورنٹائن حالات، صفائی ستھرائی اور پروازوں کی دستیابی دیکھ کر تیار کرتی ہے۔
دوسری جانب پاکستان کے وزیراعظم کے مشیر عبدالرزاق داؤد کا کہنا ہے کہ چین کو چارٹرڈ فلائٹ سے 18 ٹن سندھڑی آم ایکسپورٹ کیے گئے ہیں جو پہلی بار ہوا ہے.
Further to my previous tweet, MOC is glad to inform that for the first time a direct full shipment of 18 tons of Pakistan’s Sindhri mangoes reached Lanzhou in China via a chartered plane yesterday. This is a great event marking the 70 years of relations between China & Pakistan. pic.twitter.com/HSn5ETV7X3
— Abdul Razak Dawood (@razak_dawood) June 12, 2021
خیال رہے انڈین میڈیا نے دعویٰ کیا تھا کہ چین اور امریکہ سمیت کئی ممالک نے پاکستان کی جانب سے بھیجے گئے آموں کے تحفے قبول کرنے سے انکار کر دیا ہے۔ ان رپورٹس میں دعویٰ کیا گیا تھا کہ ان ممالک نے اپنے ہاں کورونا وائرس اور قرنطینہ ضوابط کی وجہ سے آموں کے تحفے واپس کر دیے۔
رپورٹس میں مزید کہا گیا تھا کہ پاکستان کی وزارت خارجہ نے 32 سے زائد ممالک کے سربراہان کو آموں کے باکس بطور تحفہ بھیجا تھا۔
