لاہور ہائیکورٹ کے احاطے میں وکلا کا مبینہ تشدد، پولیس اہلکار ہلاک
Reading Time: < 1 minuteپاکستان کے صوبہ پنجاب کی پولیس نے کہا ہے کہ لاہور ہائیکورٹ کے احاطے میں وکلا کے تشدد سے سب انسپکٹر محمد سلمان کی موت واقع ہوئی ہے۔
پولیس حکام کے مطابق مرنے والا سب انسپکٹر روزے سے تھا.
تشدد سے پولیس افسر کی موت کا یہ واقعہ ہائیکورٹ کے سکیورٹی سٹاف کے مطابق پیر کو جسٹس محمد وحید خان کی عدالت کے باہر پیش آیا۔
سکیورٹی سٹاف کی طرف سے جاری کی گئی تفصیل میں بتایا گیا کہ ضلع نارووال کے ایک مقدمے میں محمد طیب نامی ملزم نے ضمانت کی درخواست دائر کر رکھی تھی۔
جسٹس وحید خان کی عدالت نے ملزم کی ضمانت منظور نہیں کی جس پر ملزم محمد طیب کو عدالت سے باہر نکلنے پر سب انسپکٹر محمد سلمان نے گرفتار کر لیا۔
ملزم محمد طیب کے دو وکلا سید منظر عباس اور تنویر صادق نے سب انسپکٹر کی گرفت سے ملزم کو نکالنے کے لیے تشدد کا نشانہ بنایا۔
پولیس اہلکار تشدد کے دوران زمین پر گر کر بے ہوش ہو گیا جبکہ ملزم فرار ہونے میں کامیاب ہوا۔
پولیس اہلکار محمد سلمان کو بعد ازاں میو ہسپتال منتقل کیا گیا جہاں ڈاکٹروں نے موت کی تصدیق کی۔
