شیخ رشید کی وِگ اتارنے والے کو 50 ہزار عیدی دینے کا اعلان

پاکستان کے وزیراعظم شہباز شریف کے معاون خصوصی حنیف عباسی نے کہا ہے کہ وہ عید کے موقع پر سابق وزیر داخلہ شیخ رشید کی وِگ اتارنے والے کو 50 ہزار روپے انعام دیں گے۔

راولپنڈی میں پریس کانفرنس میں حنیف عباسی نے کہا کہ مسجد نبوی میں مریم اورنگزیب اور شاہزین بگٹی کو گالیاں دی گئی اور اس کی منصوبہ بندی شیخ رشید نے کی تھی۔

ان کا کہنا تھا کہ یہ ناموس رسالت کا مسئلہ ہے اور مدینہ کی حدود میں گستاخی کرنے والوں کو نہیں چھوڑیں گے۔

حنیف عباسی نے کہا کہ ایک گرفتاری کی گئی اور باقیوں کو بھی گرفتار کریں گے۔

انہوں نے شیخ رشید کی پریس کانفرنس میں دی گئی دھمکیوں کے جواب میں کہا کہ اب شیخ رشید راولپنڈی کی جس گلی اور جس شادی بیاہ کی تقریب میں جائیں گے ن لیگ کے کارکن اُن کو گندے انڈے اور ٹماٹر ماریں گے۔