نئی حکومت میں پہلا ریٹائرڈ جرنیل عہدہ چھوڑنے پر مجبور ہو گیا

شہباز شریف کی اتحادی حکومت آنے کے بعد پہلا ریٹائرڈ جرنیل اپنے عہدے سے ہٹنے پر مجبور ہوا ہے جس کے بارے میں کہا جاتا ہے کہ وہ پی ٹی آئی کے لیے نرم گوشہ رکھتے ہیں۔

واٹر اینڈ پاور ڈویلپمنٹ اتھارٹی (واپڈا) کے چیئرمین لیفٹیننٹ جنرل (ریٹائرڈ) مزمل حسین نے استعفٰی وزیراعظم کو بھجوایا ہے۔

استعفے کی کاپی پر پانچ مئی کی تاریخ درج ہے۔ استعفے کے متن میں ان کے دور میں ہونے والے محکمانہ ترقیاتی کاموں کا ذکر بھی کیا گیا ہے۔

چیئرمین واپڈا کے استعفے میں لکھا گیا ہے کہ ’مجھے 14 اگست 2016 کو اس عہدے سے نوازا گیا تھا اور مجھے خوشی ہے کہ اس دوران واپڈا کی ٹیم کئی اہم کارنامے انجام دیے جن میں کئی اہم منصوبے شامل تھے جیسے نیلم جہلم، کراچی کینال، تربیلا فور کی ایکسٹینشن، گولن کول، اسی طرح دو اعشاریہ چار ٹریلین کے 10 منصوبوں پر کام جاری ہے۔

استعفے میں انہوں نے وزیراعظم کو مخاطب کرتے ہوئے لکھا ہے کہ وہ کچھ ذاتی اور خاندانی معاملات کے باعث سروس کی ذمہ داریاں نبھانے سے قاصر ہیں اور استعفے کو منظور کیے جانے کی استدعا بھی کی گئی ہے۔

لیفٹیننٹ جنرل (ریٹائرڈ) مزمل حسین نے لکھا ہے کہ ’میں چاہتا ہوں کہ پاکستان اور واپڈا مزید ترقی کریں۔‘