جدہ خود کش حملہ، عرب ممالک کا سعودی عرب سے اظہار یکجہتی
Reading Time: 2 minutesعرب ممالک نے جدہ میں ایک خودکش بمبار کی ہلاکت کے بعد سعودی عرب کے ساتھ یکجہتی کا اظہار کیا ہے۔
عرب نیوز کے مطابق ہفتے کو متحدہ عرب امارات نے ایک بیان میں دھماکے کی مذمت کرتے ہوئے مملکت کی سلامتی اور استحکام کو لاحق تمام خطرات‘ کے خلاف اپنے موقف کا اعادہ کیا۔
جمعے کو مبینہ طور پر عبداللہ الشہری نے اسے گرفتار کرنے والی ایک چھاپہ مار ٹیم پر خود کش حملہ کیا جس میں ایک پاکستانی شہری اور تین سیکورٹی اہلکار زخمی ہو گئے تھے۔
امارات کی وزارت خارجہ نے سعودی سیکیورٹی فورسز کی مستعدی اور عوامی تحفظ کو برقرار رکھنے کے لیے کیے گئے اقدامات کو سراہتے ہوئے دھماکے میں زخمی ہونے والوں کی جلد صحت یابی کے لیے نیک خواہشات کا اظہار بھی کیا۔
اردن نے مملکت کو ’اس کی سلامتی کے تحفظ کے لیے اٹھائے گئے ہر قدم میں‘ حمایت کا اظہار کیا۔اردنو کی وزارت خارجہ کے ترجمان ہیثم ابو الفول نے مملکت کے استحکام اور سلامتی کو درپیش خطرات سے نمٹنے میں سعودی سکیورٹی فورسز کی کوششوں کی تعریف کی۔
بحرین سرکاری خبر رساں ایجنسی سے شائع ہونے والے ایک بیان میں بحرین نے سعودی عرب کے ساتھ ’غیر متزلزل یکجہتی‘ کا اعادہ کیا اور سلامتی کو برقرار رکھنے کے لیے انتھک کوششوں کو سراہا۔
بحرین نے اس مطلوب شخص سے نمٹنے کے لیے سیکیورٹی فورسز کے چوکس رہنے کی بھی تعریف کی جس نے اپنی گرفتاری کے دوران دھماکہ خیز بیلٹ سے دھماکہ کیا، جس سے چار افراد زخمی ہوئے۔
اسلامی تعاون کی تنظیم (او آئی سی) نے بم دھماکے کی مذمت کی اور مملکت کی حفاظت اور سلامتی کو نقصان پہنچانے والے کسی بھی خطرے کے خلاف سخت کارروائی کی تعریف کی۔
دریں اثنا عرب پارلیمنٹ کے سپیکر عادل العصومی نے اپنی اہم تنصیبات کے تحفظ، دہشت گردی سے نمٹنے اور اپنے شہریوں اور غیر ملکیوں کی حفاظت کو یقینی بنانے کے لیے مملکت کی فورسز کے چوکس اور مستعد رہنے پر اپنے اعتماد کا اظہار کیا۔
