صدر بائیڈن ریاست کے دشمن، میرے حامی سخت ردعمل دیں گے: ڈونلڈ ٹرمپ

Reading Time: 2 minutes

سابق امریکی صدر ڈونلڈ ٹرمپ نے صدر بائیڈن کو ریاست دشمن قرار دیتے ہوئے کہا ہے کہ اُن کے حامی ایسا ردعمل دیں گے جو کبھی کسی نے نہیں دیکھا ہوگا۔

فرانسیسی خبر رساں ادارے اے ایف پی کے مطابق سابق صدر نے سنیچر کو پنسلوانیا میں ایک ریلی کے دوران امریکی صدر جو بائیڈن کو شدید تنقید کا نشانہ بنایا۔

انہوں نے رواں ہفتے جو بائیڈن کی تقریر پر جوابی حملہ کیا جس میں امریکی صدر نے کہا تھا کہ ان کے پیشرو اور ریپبلکن پارٹی کے حامی ’انتہا پسندی کی نمائندگی کرتے ہیں جو ہماری جمہوریہ کی بنیادوں کو خطرہ ہے۔‘

جو بائیڈن کی  تقریر پر تبصرہ کرتے ہوئے ڈونلڈ ٹرمپ نے اپنے حامیوں کو بتایا کہ جو بائیڈن نے ’کسی بھی امریکی صدر کی طرف سے اب تک کی سب سے زیادہ شیطانی، نفرت انگیز اور تفرقہ انگیز تقریر کی ہے۔‘

ٹرمپ نے کہا کہ ’وہ ریاست کا دشمن ہے اور آپ یہ جانتے ہیں۔‘

انہوں نے مزید کہا کہ ’ہم وہ ہیں جو اپنی جمہوریت کو بچانے کی کوشش کر رہے ہیں۔ یہ بہت سادہ بات ہے۔جمہوریت کو خطرہ بنیاد پرست بائیں بازو سے ہے، دائیں بازو سے نہیں۔‘

ڈونلڈ ٹرمپ نے اپنی تقریر کے دوران فلوریڈا کے اپنے گھر پر گزشتہ ماہ ایف بی آئی کے چھاپے کی مذمت کی۔

اس چھاپے کے بعد پہلی عوامی گفتگو میں ٹرمپ نے کہا کہ یہ تلاشی ’انصاف کی دھوکہ دہی‘ تھی اور انہوں نے خبردار کیا کہ اس سے ’ایسا ردعمل سامنے آئے گا جو کسی نے کبھی نہیں دیکھا۔‘

ڈونلڈ ٹرمپ نے مزید کہا کہ ’امریکی آزادی کو درپیش حقیقی خطرات کی اس سے زیادہ کوئی واضح مثال نہیں ہو سکتی کہ صرف چند ہفتے قبل امریکی تاریخ میں کسی بھی انتظامیہ کی طرف سے طاقت کے سب سے حیران کن استعمال کا مشاہدہ کیا گیا۔‘

ڈونلڈ ٹرمپ نے ولکس بیری شہر میں منعقد ہونے والی ریلی میں اپنے حامیوں کو خوش آمدید کہتے ہوئے کہا کہ ’قانون کا یہ غلط استعمال‘ ایسا ردعمل پیدا کرے گا جو کسی نے کبھی نہیں دیکھا۔‘