ترکی کے شہر استنبول میں دھماکے سے 6 ہلاک، 53 زخمی

Reading Time: < 1 minute

ترک شہر استنبول کی ایک مصروف شاہراہ استقلال پر دھماکے میں چھ افراد ہلاک جبکہ 53 زخمی ہو گئے ہیں.

ترک صدر رجب طیب اردوغان نے اتوار دھماکے کو ’گھناؤنا حملہ‘ قرار دیتے ہوئے اس کی مذمت کی اور کہا کہ چھ افراد ہلاک اور درجنوں زخمی ہوئے۔

ترک ذرائع ابلاغ کے مطابق دھماکہ تقسیم سکوائر کے قریب ہجوم کے درمیان ہوا۔

سوشل میڈیا پر شیئر کی گئی ایک ویڈیو میں دھماکہ ہوتے ہی لوگوں کو بھاگتے دیکھا جا سکتا ہے۔

ترک ذرائع ابلاغ پر دکھائے گئے مناظر میں جائے وقوعہ پر ایمبولینس، فائر ٹرک اور پولیس اہلکار کھڑے ہیں۔

سوشل میڈیا صارفین نے دھماکے پر تبصرے کرتے ہوئے لکھا کہ انہوں نے دکانوں کے شیشے ٹوٹے ہوئے دیکھے اور شاہراہ کو ٹریفک کے لیے بند کر دیا گیا۔

دھماکہ مقامی وقت کے مطابق سہ پہر چار بج کر 20 منٹ پر ہوا۔

پاکستان کے وزیراعظم شہباز شریف نے ترکی میں ’دہشت گردی کے واقعے‘ کی شدید مذمت کی ہے۔

ایک بیان میں انہوں نے کہا کہ ’استقلال سٹریٹ میں دھماکے کی شدید مذمت کرتے ہیں۔ قیمتی انسانی جانوں کے ضیاع پر بے حد افسوس ہے۔‘

وزیراعظم شہباز شریف نے کہا کہ پاکستان ترکی کے عوام اور حکومت سے مکمل یکجہتی کا اظہار کرتا ہے۔ ہر طرح کی دہشت گردی قابل مذمت ہے۔‘