الیکشن مہم، پوسٹر/بینرز پر قیدی نمبر 804 لکھا جائے گا: عمران خان

Reading Time: 2 minutes

پاکستان تحریک انصاف کے سابق چیئرمین عمران خان نے کہا ہے کہ اُن کی حکومت نے ایران سے تعلقات بہتر بنائے۔

جمعرات کو اڈیالہ جیل میں سماعت کے دوران صحافیوں سے گفتگو میں عمران خان کا کہنا تھا کہ ایران نے جو کیا اس کی مذمت کرتے ہیں.

انہوں نے کہا کہ یہ بھی دیکھنا ہے کہ معاملات یہاں تک کیسے پہنچے،یہ بڑی خطرناک صورتحال ہے،یہ کون سی عقل ہے،کوئی ملک کو اس پوزیشن میں ڈالتا ہے.

ان کے مطابق شاہ محمود قریشی بطور وزیر خارجہ افغانستان گئے تو انہوں نے مکمل تعاون کا یقین دلایا.

سابق وزیراعظم نے کہا کہ بلاول جب وزیر خارجہ تھے تو ایک مرتبہ بھی افغانستان نہیں گئے،دہشتگردی افغانستان کے تعاون کے بغیر ختم نہیں ہو سکتی،آج افغانستان بارڈر بند کرنے کا سوچ رہا ہے.

عمران خان نے کہا کہ میں بطور وزیراعظم خود بھی ایران گیا تھا اور سپریم لیڈر سے بھی ملا تھا، جو لوگ چاہتے ہیں کہ ایران کے ساتھ تعلقات خراب ہوں وہ آج خوش ہیں.

انہوں نے سوال کیا کہ کیا ایران کے ساتھ تعلقات خراب کرنا ہمارے مفاد میں ہے؟ بی جے پی کی پاکستان کے بارے میں پالیسی بھی اچھی نہیں ہے،بڑھاوا دینے کے بجائے صورتحال کو ڈیفیوز ہونا چاہیے.

انہوں نے دعوی کیا کہ الیکشن نہ ہونے کی وجہ سے ملک کا بیڑہ غرق ہو رہا ہے،اکتوبر میں انتخابات ہو جاتے تو استحکام آ چکا ہوتا.

ان کے مطابق پی ٹی ائی کو کرش کرنے کے لیے انتخابات کو ملتوی کیا گیا، نگران وزیراعظم کو کوئی سنجیدہ نہیں لے گا.

انہوں نے کہا کہ نیوٹرل بھائی جان بھول گئے کہ ٹائم کسی کا انتظار نہیں کرتا،یہ 2002والی پلے بک نہیں ہے.

عمران خان نے کہا کہ پاکستان کی صورتحال 1970 کی ہے جب صرف پارٹی ٹکٹ جیتا تھا، جو ظلم کیا جا رہا ہے یہ ہماری انتخابی مہم ہے.

انہوں نے کہا کہ امیدواروں کے پوسٹرز پر قیدی نمبر 804 لکھا جائے گا، جو لوٹوں کے ساتھ ہو چکا ہے اب کوئی اپنی جگہ سے ہلے گا نہیں.

ان کا کہنا تھا کہ ظلم کے باوجود پارٹی اس لیے نہیں ٹوٹی کیونکہ ہمارا ووٹ بینک ہے. وکلا نے زبردست کام کیا چاہتا ہوں انہیں ٹکٹ ملیں

عمران خان نے کہا کہ مجھے ٹکٹس پر ان پٹ کم ملی اسی لئے عمر ایوب اور شبلی فراز کو ٹکٹ فائنل کرنے کا کہا ہے.