پاکستان میں موبائل فون سروس معطل، پولنگ ڈے پر ووٹرز کو مشکل

Reading Time: < 1 minute

پاکستان میں عام انتخابات کے لیے پولنگ شروع ہونے سے قبل بڑے شہروں میں موبائل فون سروس متاثر ہونے کی شکایات سامنے آئیں جس کے بعد حکومت نے تصدیق کی ہے کہ حفاظتی اقدامات کے طور پر سروس عارضی طور پر معطل کی گئی۔

وزارت داخلہ کے ترجمان نے ایک بیان میں کہا ہے کہ ملک میں دہشت گردی کے حالیہ واقعات کے نتیجے میں قیمتی جانوں کا ضیاع ہوا ہے۔

بیان کے مطابق امن وامان کی صورتحال کو قائم رکھنے اور ممکنہ خطرات سے نمٹنے کے لیے حفاظتی اقدامات ناگزیر ہیں۔

اُن کا کہنا تھا کہ اس لیے ملک بھر میں موبائل سروس کو عارضی طور پر معطل کرنے کا فیصلہ کیا گیا ہے۔

پاکستان کے چیف الیکشن کمشنر نے میڈیا سے گفتگو میں کہا کہ وہ موبائل فون سروس کی بحالی کے لیے ہدایات جاری نہیں کریں گے کیونکہ یہ اُن کا کام نہیں۔

ان کا کہنا تھا کہ سکیورٹی محکموں نے دہشت گردی کے خطرے کے پیش نظر یہ اقدام کیا ہے۔

عام انتخابات میں پولنگ سے ایک دن قبل صوبہ بلوچستان کے دو اضلاع پشین اور قلعہ سیف اللہ کیے گئے دھماکوں میں 29 افراد مارے گئے۔

دونوں دھماکوں میں مقامی انتخابی امیدواروں کے حامیوں کو نشانہ بنایا گیا۔

ملک کے چاروں صوبوں اور وفاقی دارالحکومت اسلام آباد میں موبائل فون کس وقت تک معطل رہے گی اس حوالے سے کچھ نہیں بتایا گیا۔

پاکستان ٹیلی کمیونیکیشن اتھارٹی نے پولنگ ڈے سے ایک دن قبل ایک بیان میں کہا تھا کہ انٹرنیٹ سروس بند نہیں کی جائے گی۔