طویل خشک سالی کے بعد مری میں برفباری، سیاحوں کو انتباہ

Reading Time: < 1 minute

پاکستان کے سیاحتی علاقے مری میں برفباری کے باعث سڑکوں پر پھسلن سے سفر کرنے والوں کو خبردار کیا گیا ہے۔

پنجاب کی صوبائی ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق مری میں بارش اور برف باری کا سلسلہ جاری ہے۔

ترجمان نے بتایا کہ اگلے 24 گھنٹوں تک مزید بارش و برفباری کے امکانات ہیں۔

ترجمان پی ڈی ایم اے نے کہا ہے کہ گزشتہ رات سے مری میں 2.5 انچز برفباری ریکارڈ کی گئی۔

ترجمان کے مطابق بارش اور برف باری کے باعث سڑکوں پر ٹریفک کی روانی متاثر ہو سکتی ہے ۔

ترجمان کا کہنا تھا کہ سڑکوں پر انتظامیہ کی جانب سے نمک کا چھڑکاﺅ کیا جا رہا ہے.

پی ڈی ایم اے کے ڈائریکٹر جنرل کی ہدایت پر مری انتظامیہ کو الرٹ رہنے کی ہدایات دی گئی ہیں۔

اُن کا کہنا تھا کہ انتظامیہ الرٹ ر ہے، کسی قسم کی غفلت کا مظاہرہ نہ کیا جائے۔ اور شاہراہوں پر ٹریفک کی روانی کو یقینی بنایا جائے۔

ڈی جی پی ڈی ایم اے نے بتایا کہ مری میں سیاحوں کی رہنمائی کے لیے 13 فسیلیٹیشن مراکز قائم ہیں۔

سیاحوں سے گزارش ہے کہ موسم کی صورت حال کا جائزہ لے کر سفرپر نکلیں۔
تمام ادارے عوام الناس کی خدمت میں مصروف ہیں۔

ڈی جی نے کہا کہ شہری احتیاط کریں اور غیر ضروری سفر سے گریز کریں، ایمرجنسی کی صورتحال میں پی ڈی ایم اے کی ہیلپ لائن 1129 پر رابطہ کریں۔