بلوچستان میں فوجی قافلے پر حملہ، 18 اہلکار مارے گئے

Reading Time: 2 minutes

پاکستان کے صوبہ بلوچستان میں عسکریت پسندوں نے فوج کے ایک قافلے پر حملہ کیا جس کی زد میں مسافر گاڑیاں بھی آئیں۔

پاکستان کی فوج نے تصدیق کرتے ہوئے کہا ہے کہ بلوچستان کے ضلع قلات میں دہشت گردوں کے ساتھ لڑائی میں اُس کے 18 اہلکاروں کی جانیں چلی گئی ہیں جبکہ 12 شدت پسندوں کو ہلاک کیا گیا۔

سنیچر کو راولپنڈی میں فوج کے شعبہ تعلقات عامہ سے جاری کیے گئے بیان کے مطابق گزشتہ رات قلات کے علاقے منگوچر میں دہشت گردوں نے سڑک کو بلاک کرنے کی کوشش کی تھی جس پر سکیورٹی فورسز نے کارروائی کی۔

بیان میں کہا گیا ہے کہ ’31 جنوری اور یکم فروری کی درمیان رات بلوچستان کے ضلع قلات کے علاقے منگوچر میں دہشت گردوں نے روڈ بلاک کرنے کی کوشش کی۔ دشمن اور دشمن قوتوں کی ایما پر دہشت گردی کی اس بزدلانہ کارروائی کا مقصد بنیادی طور پر معصوم شہریوں کو نشانہ بنا کر بلوچستان کے پُرامن ماحول کو خراب کرنا تھا۔‘

آئی ایس پی آر نے کہا کہ ’سیکورٹی فورسز اور قانون نافذ کرنے والے اداروں کو فوری طور پر متحرک کیا گیا جنہوں نے دہشت گردوں کے مذموم عزائم کو کامیابی کے ساتھ ناکام بنا دیا اور مقامی آبادی کے تحفظ کو یقینی بناتے ہوئے 12 دہشت گردوں کو ہلاک کر دیا۔‘

فوج کے شعبہ تعلقات عامہ نے بیان میں مزید کہا کہ ’تاہم آپریشن کے دوران دھرتی کے 18 بہادر بیٹوں نے بہادری سے لڑتے ہوئے لازوال قربانی دی اور شہادت کو گلے لگا لیا۔‘

آئی ایس پی آر نے کہا ہے کہ علاقے میں ’سینیٹائزیشن آپریشنز کیے جا رہے ہیں اور اس گھناؤنے اور بزدلانہ فعل کے مرتکب افراد، ان کے سہولت کاروں اور اس کی حوصلہ افزائی کرنے والوں کو انصاف کے کٹہرے میں لایا جائے گا۔‘

فوج کے ترجمان کے مطابق ’پاکستان کی سیکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔‘

قبل ازیں عینی شاہدین نے بتایا تھا کہ جمعے کو رات گئے اس حملے میں متعدد اہلکار اور جوابی کارروائی میں عسکریت پسند مارے گئے۔

علاقے سے سوشل میڈیا پر پوسٹ کی گئی ویڈیو فوٹیجز کے مطابق شاہراہ پر دور تک گاڑیوں کی قطاریں ہیں اور فائرنگ کی آوازیں سنائی دے رہی ہیں۔

پاکستان24 آزادانہ طور پر اس فوٹیجز کی تصدیق نہیں کر سکا۔

مقامی سکیورٹی ذرائع کے مطابق حملہ چھٹیوں پر گھر جانے والے اہلکاروں پر کیا گیا جس میں بڑا جانی نقصان ہوا ہے۔

مسافر گاڑیوں میں موجود ایک شخص نے نام ظاہر نہ کرنے کی شرط پر بتایا کہ اچانک شدید فائرنگ شروع ہوئی جو گھنٹے سے زائد تک جاری رہی۔

سکیورٹی فورسز نے جوابی فائرنگ سے عسکریت پسندوں کو علاقہ چھوڑنے پر مجبور کیا تاہم اس دوران متعدد قریبی عمارتوں اور ایک بینک کو نقصان پہنچا۔

حملے کے دوران فائرنگ سے مسافر گاڑیاں بھی زد میں آئیں اور ان میں موجود کم از کم تین افراد زخمی ہوئے۔