پاکستان کی حکومت کا ڈیزل 30 سے 32 روپے فی لیٹر سستا کرنے کا اعلان

پاکستان کے وفاقی وزیر اطلاعات عطاء اللہ تارڑ اور وفاقی وزیر پیٹرولیم علی پرویز ملک نے کہا ہے کہ وزیراعظم شہباز شریف کی ہدایت پر آئل ریفائنریز کے ساتھ مذاکرات کیے گئے ہیں اور ڈیزل کی قیمت میں 30 سے 32 روپے فی لیٹر تک کمی کا امکان ہے، جبکہ اوگرا آج اس حوالے سے اعلان کرے گا۔

اسلام آباد میں بدھ کے روز خصوصی گفتگو میں عطاء اللہ تارڑ نے کہا کہ وزیراعظم نے آج اجلاس میں آئل ریفائنریز کے ساتھ مذاکرات کی ہدایت کی اور حکومت کی ترجیح ہے کہ عوام کو ہر ممکن ریلیف فراہم کیا جائے۔

انھوں نے کہا کہ خطے میں جنگ کے باعث دنیا بھر میں تیل کی قیمتوں میں اضافہ ہوا، تاہم حکومت عوام پر بوجھ کم کرنے کی کوشش کر رہی ہے۔ ان کے مطابق ڈیزل کی قیمتوں میں کمی سے کسانوں اور ٹرانسپورٹ کے شعبے کو ریلیف ملے گا۔

عطاء اللہ تارڑ نے مزید کہا کہ آئندہ دنوں میں عوام کو مزید خوش خبریاں بھی ملیں گی۔

وفاقی وزیر پیٹرولیم علی پرویز ملک نے کہا کہ حکومت کو عوامی مسائل کا مکمل ادراک ہے اور وزیراعظم کی قیادت میں عوام کو ریلیف فراہم کرنے کے لیے مختلف اقدامات کیے گئے ہیں۔

انھوں نے کہا کہ عوام کو ٹارگٹڈ سبسڈی کے ذریعے بھی ریلیف دیا گیا ہے اور حکومت معاشی مشکلات کے حل کے لیے کوشاں ہے۔

علی پرویز ملک کے مطابق بین الاقوامی مارکیٹ میں خام تیل کی قیمتوں میں اضافہ ہوا ہے جبکہ ڈیزل پیدا کرنے والے ملک روس کو بھی مشکلات کا سامنا ہے۔

ان کا کہنا تھا کہ وزیراعظم کی ہدایت پر آئل ریفائنریز کے حکام کے ساتھ دو سے تین نشستیں ہوئیں، جن میں ریفائنریز نے ڈیزل کی قیمت میں نمایاں کمی کی یقین دہانی کرائی۔

وفاقی وزیر نے کہا کہ ڈیزل کی قیمت میں 30 سے 32 روپے فی لیٹر تک کمی کا امکان ہے اور حکومت آئل ریفائنریز کے تعاون کی شکر گزار ہے۔