امریکہ میں طیارے نے لینڈنگ کے بعد رن سے باہر نکل کر گاڑیوںکو ٹکر مار دی، 5 ہلاک
حکام کے مطابق اتوار کے روز امریکی ریاست فلوریڈا کے شہر میامی کے انٹرنیشنل ایئرپورٹ پر لینڈنگ کے دوران ایمیزون پرائم ایئر کی ایک کارگو پرواز رن وے پر گر کر تباہ ہونے سے کم از کم پانچ افراد ہلاک ہو گئے ہیں۔
اتوار کی سہ پہر ایک پریس کانفرنس کے دوران حکام نے بتایا کہ پرائم ایئر کی پرواز 7598 مقامی وقت دوپہر 2 بجے سے کچھ دیر قبل ایئرپورٹ کے ترچھے (ڈائیگنل) رن وے سے آگے نکل گئی اور زمین پر موجود متعدد گاڑیوں سے ٹکرا گئی۔
میامی-ڈیڈ فائر محکمے چیف رے جادللہ نے بتایا کہ اس حادثے میں پانچ افراد زخمی بھی ہوئے، جن میں سے تین کی حالت تشویشناک ہے۔
جاد اللہ کے مطابق کم از کم دو افراد ان گاڑیوں میں پھنس گئے تھے جنہیں طیارے نے ٹکر ماری تھی، جبکہ حادثے کے نتیجے میں پائلٹ اور کو پائلٹ بھی طیارے کے اندر ہی پھنس گئے تھے۔
حکام نے ہلاک ہونے والوں کی شناخت ظاہر کرنے سے انکار کیا۔
میامی-ڈیڈ فائر ریسکیو نے ایک بیان میں کہا کہ اس واقعے کے بعد 60 سے زائد امدادی یونٹس اور تقریباً 200 اہلکاروں نے کارروائی میں حصہ لیا۔ جادللہ نے بتایا کہ سہ پہر کے بعد تک ہنگامی امدادی عملہ طیارے سے ایندھن کے جاری اخراج (لیک) کو روکنے یا اس سے نمٹنے میں مصروف تھا۔
اگرچہ حادثے کے فوراً بعد ہوائی اڈے پر تمام پروازیں روک دی گئی تھیں، لیکن اتوار کی شام تک اس کے چار میں سے دو رن ویز دوبارہ کھول دیے گئے تھے۔
فلائٹ ٹریکنگ سروس ‘فلائٹ ریڈار 24’ کے مطابق، سان جوآن، پورٹو ریکو سے اڑان بھرنے والا یہ طیارہ 32 سال پرانا ‘بوئنگ 767-300’ فریٹر (مال بردار طیارہ) تھا، جو 1994 سے 2015 کے دوران مختلف ایئر لائنز کے لیے مسافر بردار طیارے کے طور پر بھی استعمال ہوتا رہا تھا۔
