نامعلوم افراد مشرف کو کھمبوں پر ’لٹکانے‘ لگے
پاکستان میں عدالت کی جانب سے سابق ڈکٹیٹر پرویز مشرف کو سزائے موت سنائے جانے کے بعد ملک کے کئی بڑے شہروں کی اہم شاہراؤں پر ان کے حق بینرز آویزاں کیے گئے ہیں۔
مجرم قرار دیے گئے پرویز مشرف کو ہیرو قرار دینے کے بینرز سیالکوٹ کی شاہراہ پر لگے کھمبوں سے لٹکانے کی ایک ویڈیو سوشل میڈیا پر وائرل ہے جس میں ایک رکشے میں سوار دو نوجوان عدلیہ کے خلاف نعروں پر مبنی بینرز بھی لٹکا رہے ہیں۔
پاکستان کی فوج کے ترجمان نے مشرف کے خلاف فیصلے کو آئین و قانون کے خلاف قرار دیا تھا جبکہ اپنی ریٹائرمنٹ کے موقع پر خطاب کرتے ہوئے جسٹس آصف کھوسہ نے کہا تھا کہ عدلیہ کے خلاف مہم شروع کر دی گئی ہے۔
وفاقی دارالحکومت اسلام آباد اور فوج کے صدر دفتر والے شہر راولپنڈی کی سڑکوں پر بھی عدلیہ مخالف اور پرویز مشرف کی حمایت میں بینرز لٹکائے گئے ہیں۔
بدتمیز نامی ٹوئٹر ہینڈل سے پوسٹ کی گئی ویڈیو کے مطابق سیالکوٹ میں ایسے بینرز آویزاں کرنے والے افراد کا کہنا ہے کہ وہ نہیں جانتے کن کے کہنے پر یہ کام کر رہے ہیں۔
ویڈیو ٹویٹ کرنے والے نے لکھا ہے کہ ”عدلیہ کیخلاف محاذِ جنگ کھُل گیا۔ سیالکوٹ خواجہ صفدر روڈ پر ماسک پہنے لوگ بلا نمبر پلیٹ گاڑیوں پر عدلیہ کے خلاف اور غدار مشرف کے حق میں فلیکس آویزاں کر رھے ہیں۔ سوال کرنے پر کہتے ہیں:
"ہمیں آرڈر کسی اور نے دیا ہے، یہ نہیں پتہ لگوا کون رہا ہے۔” https://t.co/fd2KgHaipY
اس ویڈیو کو ہزاروں افراد نے دیکھا اور لائک کیا ہے جبکہ بعض صارفین نے حکومت اور عدلیہ سے نوٹس لینے کی بھی اپیل کی ہے۔
