لاک ڈاؤن میں پولیس اور شہریوں کی حالت

پاکستان میں لاک ڈاؤن کے دوران سندھ اور پنجاب پولیس کے رویے کے خلاف شکایات سامنے آ رہی ہیں۔

سندھ پولیس نے پہلے دن گھروں سے نکلنے والے شہریوں سے بدتمیزی کی، کئی علاقوں میں شہریوں کو مرغا بنایا اور بیٹھکیں لگوائیں۔

پنجاب میں پولیس نے ضروری کاموں کے لیے گھروں سے نکلنے والے شہریوں سے گالم گلوچ کی اور مبینہ طور پر بعض شہروں میں رشوت بھی طلب کی۔

لاہور کے بعض مقامات پر شہریوں کے لیے دودھ فراہم کرنے والی گاڑیوں کی پکڑ دھکڑ اور تھانے منتقل کرنے کی شکایات بھی موصول ہوئیں۔

ادھر مختلف علاقوں اور موٹر وے پر پھنسے شہریوں نے بسوں میں سامان کے لیے مختص جگہوں پر چھپ کر سفر کیا۔

دوسری جانب انڈین پنجاب میں پولیس نے گھروں سے نکلنے والے شہریوں سے بیٹھکیں لگوائیں اور کہلوایا کہ ”ہم سماج کے دشمن ہیں۔“

سوشل میڈیا پر صارفین نے پولیس کے رویے کو تنقید کا نشانہ بنایا اور لکھا کہ تضحیک بند کی جائے۔